Münhen hava limanında 48 saatlıq tətilin ciddi problemlərə səbəb olacağı gözlənilir
Almaniyanın Münhen hava limanında dövlət sektoru və yerüstü xidmət personalı tərəfindən 48 saatlıq xəbərdarlıq tətillərinin 27 və 28 fevral tarixlərində əhəmiyyətli fasilələrə səbəb olacağı gözlənilir.
Münhen Hava Limanından verilən açıqlamada xatırladılıb ki, Birləşmiş Xidmət Sektoru Birliyi (Ver.di) hava limanında müxtəlif şirkətlərin işçilərini 27 və 28 fevral tarixlərində iki günlük tətilə çağırıb.
Açıqlamada tətillərin daşıma əməliyyatlarına əhəmiyyətli dərəcədə təsir edəcəyinin gözlənildiyi və sərnişinlərdən hava limanına çatmazdan əvvəl hava yolları ilə uçuş statuslarını yoxlamaları istənilib.
Münhen Hava Limanı Avropanın ən böyük aviaşirkətlərindən biri olan "Lufthansa"nın əsas mərkəzlərindən biri kimi xidmət edir.
Tətil günlərində hava limanında planlaşdırılan 1600-dən çox reysin əksəriyyətinin aviaşirkətlər tərəfindən ləğv ediləcəyi gözlənilir.
Alman həmkarlar ittifaqı Ver.di daha əvvəl Almaniyanın ikinci ən böyük hava limanında dövlət sektoru işçiləri və yerüstü xidmət işçiləri üçün "maaşların artırılması" danışıqlarının ikinci raundu uğursuzluqla nəticələndikdən sonra tətilə çağırmışdı.
Tətil təşəbbüsü ilə Ver.di hava limanında ictimai və yerüstü xidmət işçilərinə ödənilən əmək haqqını yaxşılaşdırmaq məqsədi daşıyır.
Həmkarlar ittifaqı sözügedən işçilərin maaşlarının 8 faiz artırılmasını tələb edir. Bundan əlavə, həmkarlar ittifaqının tələblərinə ayda ən azı 350 avro əlavə müavinət və 3 günlük əlavə məzuniyyət daxildir.
İşəgötürənlər də həmkarlar ittifaqının tələblərinin onları maddi cəhətdən çətin vəziyyətə salacağını iddia edərək faiz dərəcələrinin artmasına və yüksək borclara diqqət çəkirlər.
