Yerə yaxınlaşan asteroid 15 mərtəbəli bina hündürlüyündədir
NASA yerə dəymə ehtimalı səbəbiylə qısa çaxnaşmaya səbəb olan 2024 YR4 asteroidinin bir bina böyüklüyündə olduğunu açıqlayıb.
"Webb" kosmos teleskopu 2032-ci ildə yerə çarpacağı düşünülən asteroidin təfərrüatlı şəkillərini əldə edib. Keçən il kəşf edilən və ilkin hesablamalara görə yerlə toqquşma ehtimalı 3 faiz olan asteroid bütün dünyada narahatlığa səbəb olub.
Lakin əlavə müşahidələr göstərib ki, bu təhlükə demək olar ki, sıfıra enib. Bununla belə, asteroidin aya dəyməsi ehtimalı hələ də var.
NASA və Avropa Kosmik Agentliyinin (ESA) yaydığı görüntülər asteroidin diametrinin təxminən 60 metr, yaxud 15 mərtəbəli binanın ölçüsündə olduğunu göstərir.
"Webb" kosmosa göndərilən ən böyük və ən güclü teleskop olsa da, bu asteroid indiyə qədər müşahidə etdiyi ən kiçik obyektdir.
Cons Hopkins Universitetinin astronomu Endryu Rivkin "Webb"in apardığı müşahidələrin gələcəkdə yer üçün təhlükə yarada biləcək asteroidləri izləmək üçün çox mühüm cəhd olduğunu bildirib.
Yer səthindəki teleskoplar da son aylarda kosmos qayasını izləməyə davam edir. "Bu müşahidələr bizə 2024 YR4 ölçüsündə olan digər asteroidlər haqqında mühüm məlumat verir və gələcəkdə yer üçün potensial təhlükələri anlamağa kömək edir", - deyə Rivkin bildirib.
