BDU-da təlim: Autizm: səssiz duyğular, sonsuz imkanlar
Bakı Dövlət Universitetinin (BDU) "BDU könüllüləri" təşkilatının Sosial elmlər və psixologiya fakültəsi üzrə üzvlərinin təşkilatçılığı ilə "Autizm: səssiz duyğular, sonsuz imkanlar" adlı maarifləndirici təlim keçirilib.
BDU mətbuat xidmətindən AFN.az-a verilən məlumata görə, təlimin məqsədi tələbələrdə autizm haqqında doğru təsəvvür formalaşdırmaq, elmi əsaslara söykənən bilikləri artırmaq və autizmli şəxslərlə düzgün ünsiyyəti öyrətməkdir.
Təlimdə Psixologiya kafedrasının doktorantı, təlimçi Lamiyə Əhmədli-Şirinova Autizm Spektr Pozuntusu (ASP) barədə ətraflı məlumat verib. O, autizmin yaranma səbəbləri, erkən əlamətləri, inkişaf dinamikası və müalicə metodları kimi mövzulara toxunub. Həmçinin, autizmi olan insanlarla effektiv ünsiyyət üsulları, onların sosial həyatdakı çətinlikləri və bu problemlərin həlli yolları barədə danışıb. Mövzu ilə bağlı cəmiyyətdə mövcud olan bəzi yanlış təsəvvürlər də tələbələrin diqqətinə çatdırılıb.
Sonda tələbələrin mövzu ətrafında sualları cavablandırılıb.
