Cənubi Koreyada prezident seçkiləri iyunun 3-də keçiriləcək
Keçmiş prezident Yoon Suk Yeolun vəzifəsindən uzaqlaşdırılmasından sonra Cənubi Koreya yeni prezidenti müəyyən etmək üçün iyunun 3-də seçkilərin keçirilməsinə qərar verib.
"Yonhap"ın məlumatına görə, prezident səlahiyyətlərini icra edən baş nazir Han Duk-Sunun sədrliyi ilə keçirilən kabinet iclasında seçkilərin tarixi müəyyən edilib.
Seçki təqviminə əsasən, namizədlər ərizələrini mayın 11-dək təqdim edəcəklər və mayın 12-dən seçki kampaniyasına başlanılacaq.
Yeni prezident iyunun 3-də keçiriləcək seçkilərdən sonra vəzifəsinin icrasına başlayacaq.
Konstitusiya Məhkəməsinin impiçment qərarından sonra növbədənkənar prezident seçkiləri ən geci 60 gün ərzində keçirilməlidir.
