Britaniya Ukraynaya 450 milyon funt-sterlinq hərbi yardım edəcək
Böyük Britaniya Ukraynaya 450 milyon funt sterlinq (590 milyon dollar) yardım edəcək.
AFN.az xarici mediaya istinadən xəbər verir ki, bu barədə Böyük Britaniya Müdafiə Nazirliyinin yaydığı bəyanatda deyilir.
Bildirilir ki, bu məbləğin 350 milyon funt-sterlinqi artıq Kiyev üçün bu il nəzərdə tutulan 4,5 milyard funt-sterlinqlik rekord hərbi yardım paketinə daxil edilib.
Aprelin 11-də elan edilən məbləğin 160 milyon funt-sterlinqi əvvəllər Ukraynaya verilmiş maşın və avadanlıqların təmiri və texniki xidmətinə sərf olunacaq. "Bugünkü paketə həmçinin Böyük Britaniya və Norveçin vəsaitlərindən istifadə etməklə radar sistemləri, tank əleyhinə minalar və yüz minlərlə pilotsuz uçan aparatların maliyyələşdirilməsi, yaxın döyüşlərdə yeni hərbi yardım paketi daxildir" - deyə açıqlamada qeyd edilib.
Vəsaitlərin ayrılması ilə bağlı elan Brüsseldə keçirilən Ukraynaya silah tədarükü üzrə təmas qrupunun görüşünə təsadüf edir. Tədbirə Böyük Britaniya və Almaniya sədrlik edir.
