Tayvanda sürücü qırmızı işıqda keçərək 15 nəfəri vurub: 3 nəfər ölüb
Tayvanın Sinbey şəhərində avtomobil sürücüsü qırmızı işıqda keçərək azı 15 nəfəri vurub. Hadisə nəticəsində 3 nəfər həyatını itirib. Bu barədə 19 may tarixində "Focus Taiwan" agentliyi yerli polisə istinadla məlumat yayıb.
Məlumata görə, 78 yaşlı sürücü, soyadı Yu olan şəxs, qırmızı işığa məhəl qoymadan hərəkət edib və hadisə orta məktəbin yaxınlığında baş verib. Qəza yerli vaxtla saat 16:00 radələrində dərs bitdikdən sonra evlərinə qayıdan məktəblilərin yolu keçdiyi anda qeydə alınıb.
Polisin açıqlamasına əsasən, sürücü əvvəlcə üç motosikletə və bir velosipedə çırpılıb, daha sonra isə Fusin küçəsinin 132-ci döngəsində hərəkətini davam etdirərək yalnız yolayırıcı maneəyə dəyərək dayanıb.
Hadisə nəticəsində əksəriyyəti məktəbli olmaqla 15 nəfər müxtəlif dərəcəli bədən xəsarətləri alıb. Yaralılar dərhal xəstəxanalara çatdırılıb.
Saat 18:30-a olan məlumata görə, təxminən 40 yaşlı bir qadın və 10 yaşlarında iki qız uşağı aldıqları xəsarətlərdən dünyasını dəyişib.
Polis hadisə ilə bağlı araşdırmalara başlayıb.
