ABŞ və Almaniyadan göndərilən 14 hərbi yük təyyarəsi İsrailə çatıb
İsrail Müdafiə Nazirliyi İranla davam edən hərbi gərginlik fonunda ABŞ və Almaniyadan ordunu dəstəkləmək məqsədilə avadanlıq və ləvazimatla yüklənmiş 14 yeni hərbi yük təyyarəsinin ölkəyə çatdığını açıqlayıb.
Nazirliyin yaydığı açıqlamada bildirilir ki, bu təyyarələr 13 iyun tarixindən etibarən İsrailin İrana qarşı hücumlara başlamasından sonra istifadə edilən hava və dəniz körpülərinin bir hissəsi olaraq ölkəyə gəlib.
Açıqlamada qeyd olunur ki, göndərilən avadanlıq ordunun operativ hazırlığını dəstəkləməyi hədəfləyir və bu, 7 oktyabr 2023-cü ildə Qəzzaya qarşı müharibənin başlanmasından bu yana İsrailə çatan 800-dən çox hərbi yük təyyarəsinin davamıdır.
İsrail Müdafiə Nazirliyi avadanlığın məzmunu barədə məlumat verməyib, Vaşinqton və Berlindən isə hələlik heç bir açıqlama verilməyib.
