Demokratlardan “Epşteyn sənədləri açıqlansın” çağırışı
ABŞ Nümayəndələr Palatasının bəzi Demokrat üzvləri azyaşlı qızlara qarşı cinsi istismar və fahişəlik şəbəkəsi qurmaqda ittiham olunaraq həbsdə ikən ölü tapılan milyarder Cefri Epşteyn ilə bağlı bütün sənədlərin ictimaiyyətə açıqlanması üçün Donald Tramp administrasiyasına çağırış ediblər.
Nümayəndələr Palatasının azlıq lideri Hakim Cefris Konqres binasında verdiyi açıqlamada bildirib ki, Amerika xalqının Epşteyn məsələsinə dair tam həqiqəti bilməyə haqqı var.
Cefris Tramp və o dövrün ədliyyə naziri Pam Bondini illərlə Epşteyn işi üzərindən spekulyasiyalar aparmaqda ittiham edib:
“İndi artıq olan oldu. Tramp administrasiyası və Ədliyyə Nazirliyi nəyi gizlədir? Əgər heç nə gizlətmirsinizsə, bunu Amerika xalqına sübut edin. Amma əgər nələrisə gizləməyə çalışırsınızsa – ki Trampın bir çox tərəfdarına görə belədir – onda Konqres gerçəyi ortaya çıxarmaq üçün qətiyyətlə hərəkət etməlidir”.
Cefris qarşılarında iki ehtimal olduğunu deyib:
“Ya Tramp və Bondi illərlə bilərəkdən yalan danışıblar, ya da bu məsələdə ört-basdır cəhdi var”.
O əlavə edib ki, Konqres Amerika xalqı adından suallar verməli və cavab axtarmalıdır.
Nümayəndələr Palatasının üzvü Ro Xanna da Epşteyn sənədlərinin tam açıqlanmasını tələb edən bir dəyişiklik təklifi irəli sürdüyünü açıqlayıb. O bildirib ki, təmsilçilər sabah ya sadə amerikalıların yanında olub sənədlərin açıqlanmasına səs verəcəklər, ya da varlıların və güclülərin tərəfində yer alacaqlar.
Digər Demokrat konqresmen Mark Visey isə Tramp və Bondi ilə bağlı Epşteyn sənədlərinin tam şəkildə açıqlanmasını tələb edən qərar layihəsi təqdim etdiklərini, lakin heç bir Respublikaçının bu layihəyə dəstək vermədiyini vurğulayıb.
“Diqqətiniz üçün təşəkkür edirəm,” – deyə Veasey sarkazmla bildirib.
Qeyd edək ki, Cefri Epşteyn 2019-cu ildə Nyu-Yorkda federal həbsxanada ölü tapılmışdı. Onun ölümü və əlaqələri uzun müddətdir ABŞ-da siyasi və ictimai müzakirələrə səbəb olub. Demokratların çağırışı bu qalmaqallı məsələdə şəffaflıq tələblərini yenidən gündəmə gətirir.
