BMT-də plastik çirkliliklə mübarizə konfransında razılıq əldə olunmadı
Birləşmiş Millətlər Təşkilatının Ətraf Mühit Proqramı (UNEP) tərəfindən təşkil olunan və plastik çirkliliyin azaldılmasına dair beynəlxalq hüquqi öhdəlik daşıyan sənədin hazırlanması üzrə razılıq əldə etməyi hədəfləyən görüş ortaq mətndə razılıq təmin olunmadan başa çatıb.
İsveçrənin Cenevrə şəhərində 5 avqustdan bəri davam edən Hökumətlərarası Danışıqlar Komitəsinin beşinci sessiyasının ikinci hissəsi (INC-5.2) bu gün yekunlaşıb.
Görüşdə üzv dövlətlərin ortaq mətndə razılığa gələ bilməməsi səbəbindən tələb olunan razılıq əldə edilməyib.
UNEP İcraçı Direktoru İnqer Andersen görüşdən sonra mətbuata verdiyi açıqlamasında “Açıq şəkildə qeyd etməliyik ki, bu mərhələdə istədiyimiz nəticəyə çatmadıq, lakin hər kəsin buraya razılığı tamamlamaq niyyəti ilə gəldiyinə inanıram” deyib.
Dünyanın açıq şəkildə siyasi mürəkkəblik dövründə olduğunu vurğulayan Andersen bildirib ki, bu proses iqtisadi çətinliklər və çoxtərəfli mürəkkəblik şəraitində baş verir.
Andersen əlavə edib: “Bütün bu dərin çətinliklərə və hamımızın yaşadığı məyusluğa baxmayaraq, əhəmiyyətli irəliləyiş əldə edildiyini qəbul etməliyik. Qırmızı xətlərin müəyyənləşdirilməsində irəliləyiş olub. Ölkələr arasında müzakirələrdə irəliləyiş əldə edilib. Bu irəliləyiş insanların razılıq tələb etməsi və qarşıda çox işin olması sayəsində mümkün olub. İstədiyimiz nöqtəyə çata bilmədik, amma insanlar razılıq istəyir. Hər kəsin başa düşməsi vacibdir ki, bu iş dayanmayacaq, plastik çirkliliyi də dayanmayacaq.”
Andersen qeyd edib ki, UNEP olaraq bu prosesi dəstəkləyirlər və fəaliyyətlərini davam etdirəcəklər. O əlavə edib: “Üzv dövlətləri arzu etdikləri şəkildə çoxtərəfli prosesdə iştirak etməyə davam edəcəyik. Həmçinin, dəniz mühitində də daxil olmaqla, plastik çirkliliyin daha yaxşı idarə olunması və aradan qaldırılması üçün proqram dəstəyi tələb edən üzv dövlətlərlə yerli səviyyədə əməkdaşlıq edəcəyik.”
Görüşdə iştirak edən ölkələr ortaq mətndə razılıq əldə edilmədiyi üçün məyusluq yaşayıb və bunu tarixi fürsəti əldən vermək kimi qiymətləndiriblər.
