38 il nahaq yerə həbs edilən şəxsə 25 milyon dollar təzminat ödənəcək
ABŞ-ın Kaliforniya ştatında 38 il boyunca haqsız yerə həbs edilən şəxsə 25 milyon dollar təzminat ödənməsinə qərar verilib. Hüquqşünasları bunun ştat tarixində ən böyük həbs təzminatı olduğunu açıqlayıblar.
72 yaşlı Moris Hastings 1983-cü ildə Roberta Vaydermayerin cinsi təcavüzə məruz qalaraq başından atəşlə qətlə yetirilməsi işi üzrə ömürlük həbs cəzasına məhkum edilmişdi.
Hastings 2022-ci ildə aparılan DNA testləri nəticəsində günahsız olduğu müəyyən edilərək azadlığa buraxılıb.
Həmin vaxt tibbi ekspertizanın müayinəsi zamanı təcavüzkardan bədən mayeləri toplanıb. Hastings 2000-ci ildə DNT testi tələb etsə də, prokurorluq bu tələbi rədd edib. 2021-ci ildə yenidən müraciət edib və test nəticəsində nümunələrin ona məxsus olmadığı müəyyən edilib.
DNT məlumatları başqa bir ağır cinayətdə məhkum olunmuş Kenet Pakketlə üst-üstə düşüb. Pakket Vaydermayer cinayətindən qısa müddət sonra başqa bir cinayətə görə həbs olunmuşdu, lakin bu qətllə əlaqələndirilməmişdi. Pakket 2020-ci ildə həbsxanada ölüb.
2023-cü ildə məhkəmə Hastingsin faktiki olaraq günahsız olduğuna qərar verib. Avqustda əldə olunan razılaşma ilə Hastingsə 25 milyon dollar təzminat ödənməsinə qərar verilib.
Hastings açıqlamasında deyib ki, oğurlanmış 38 ilimi heç bir pul geri gətirə bilməz, amma bu razılaşma uzun bir yolun sonunda mənim üçün əhəmiyyətli bir bağlanış olub və həyatıma davam etməyi səbirsizliklə gözləyirəm.
Hastingsin vəkili Nik Brustin bildirib ki, Kaliforniyadakı və ölkə üzrə polis qurumları bu qədər ağır bir məhkəmə səhvinin qiymətinin çox yüksək olduğunu artıq görməlidir.
Hastingsin hazırda Cənubi Kaliforniyada yaşadığı və kilsə fəaliyyətlərində fəal olduğu qeyd olunur.
