İqlimdə kritik dönəm: 2023-2025-ci illər 1,5 dərəcə həddini aşacaq
2025-ci ilin noyabrı ən isti üçüncü noyabr olaraq qeydə alınarkən, mütəxəssislər daha narahatedici tabloya diqqət çəkiblər: 2023-2025 dövrü, qlobal temperatur artımının kritik 1,5 dərəcə həddini aşan ilk üçillik dövr olaraq tarixə düşməyə hazırlaşır.
Avropa İttifaqının (Aİ) Copernicus İqlim Dəyişikliyi Xidməti (C3S) tərəfindən yayımlanan aylıq temperatur analizinə görə, 2025-ci ilin noyabrı qlobal miqyasda ölçülən üçüncü ən isti noyabr ayı olub. Ötən ay qlobal səth temperaturunun orta göstəricisi 1991-2020 dövrünün ortalamasından 0,65 dərəcə yüksək olaraq 14,02 dərəcə ölçülüb. Kanada şimalı və Arktik Okeanında isə orta temperaturdan yüksək göstəricilər qeydə alınıb.
2025-ci ilin noyabrı qeydlərdəki ən isti eyni ay olan 2023-cü ilin noyabrından 0,20 dərəcə, 2024-cü ilin noyabrından isə 0,08 dərəcə daha sərin olub.
Ötən ayın orta səth temperaturu sənaye öncəsi dövr olan 1850-1900 illərinin ortalamasına görə 1,54 dərəcə artım göstərib.
2025-ci ilin yanvar-noyabr dövründəki orta temperaturlar isə qeydlərdəki ən isti ikinci il olan 2023-cü ilin eyni dövrü ilə oxşar səciyyəyə malik olub və 1850-1900 ortalamasından 1,48 dərəcə yüksək olub.
C3S qlobal temperaturlardakı bu anomaliyaları nəzərə alaraq, 2025-in 2023-cü illə eyni və ya çox yaxın dinamikalar göstərdiyini və qeydlərdəki ən isti ikinci il olacağını proqnozlaşdırıb.
Beləliklə, 2024-cü il qeydlərdə ən isti il olaraq qalarkən, 2023 və 2025-ci illər ən isti ikinci illər kimi tarixə düşəcək.
Qlobal orta temperatur artımının bu il sənaye öncəsi dövr ortalamasına görə 1,5 dərəcəni aşması gözlənilməsə də, 2023-2025 dövrü bu həddi aşan ilk üçillik dövr olacaq.
C3S-in direktor müavini və Strateji İqlim Lideri Samantha Burgess analizi şərh edərək bildirib ki, ötən ay qlobal temperatur artımı sənaye öncəsi dövr ortalamasına görə 1,54 dərəcəyə çatıb.
