Beynəlxalq Kosmik Stansiyada ilk tibbi təxliyə əməliyyatı həyata keçiriləcək
NASA Beynəlxalq Kosmik Stansiyada (BKS) xidmət edən dörd nəfərlik ekipajın üzvlərindən birində yaranmış ciddi sağlamlıq problemi səbəbilə planlaşdırılandan bir ay əvvəl Yerə qayıdacağını açıqlayıb. Bu qərar stansiyanın 25 ildən artıq tarixində ilk tibbi təxliyə əməliyyatı kimi qiymətləndirilir.
NASA xəstə hüquqları və məxfilik protokollarına uyğun olaraq astronavtın adını və xəstəliyin detallarını açıqlamayıb, lakin sözügedən şəxsin vəziyyətinin stabil olduğunu bildirib. Qurum rəsmiləri bunun təcili təxliyə olmadığını, qərarın astronavtın sağlamlığını riskə atmamaq üçün profilaktik məqsədlə verildiyini vurğulayıblar.
Sağlamlıq problemi ilk dəfə çərşənbə günü, cümə axşamına planlaşdırılan kosmik yürüşün NASA tərəfindən qəfil ləğv edilməsi ilə gündəmə gəlib. Rəsmilər narahatlığın kosmik əməliyyatlarla və ya hər hansı xəsarətlə bağlı olmadığını bir daha təsdiqləyiblər.
