Bosniyada "insan ovuna" çıxanlarla bağlı təhqiqat başladılıb
Bosniya müharibəsi zamanı İtaliyadan həftəsonu turları ilə Sarayevoya gedərək əyləncə məqsədilə serb snayperlərinə böyük məbləğdə pul verən və onlarla birlikdə bosniyalı mülki şəxslərə atəş açan şəxslərə qarşı Milanda aparılan təhqiqatda bir nəfərin dindirilməyə çağırıldığı bildirilib.
1992–1995-ci illərdəki Bosniya müharibəsi zamanı baş verən Sarayevo mühasirəsində İtaliya və digər ölkələrdən iştirak edən, "həftəsonu snayperləri" kimi tanınan şəxslərə qarşı Milan Respublika Baş Prokurorluğunun 2025-ci ilin noyabrında başladığı təhqiqatda yeni irəliləyiş qeydə alınıb.
İtaliyanın ANSA agentliyinin məlumatına görə, Milan Respublika Baş Prokurorluğundan Alessandro Qobbisin rəhbərlik etdiyi təhqiqat çərçivəsində ölkənin cənub-şərqindəki Pordenone şəhərində yaşayan 80 yaşlı keçmiş yük maşını sürücüsünə dünən dindirilməyə çağırış vərəqəsi təqdim olunub. Sözügedən şəxsin qəsdən adam öldürmə maddəsi ilə araşdırılacağı və dindirilmənin fevralın 9-da keçiriləcəyi gözlənilir.
Milan Respublika Baş Prokurorluğunun dindirməyə çağırdığı şəxs hazırda şəxsiyyəti məlum olmayan digər şəxslərlə birlikdə eyni cinayət planını tətbiq edərək, 1992-1995-ci illər arasında Sarayevo şəhəri ətrafındakı təpələrdən snayper tüfəngləri ilə atəş açaraq qadınlar, qocalar və uşaqlar da daxil olmaqla silahsız mülki şəxslərin ölümünə səbəb olmaqda ittiham edilir. Mətbuatda yer alan digər məlumatlarda isə həmin şəxsin 1990-cı illərdə mühasirə altındakı Sarayevoda "insan ovuna" çıxması ilə bağlı öyündüyü iddia olunur.
İtaliyada illər sonra təhqiqat başladılıb
İtalyan jurnalist-yazar Ezio Qavazzeni Sarayevo mühasirəsi ilə bağlı topladığı sənəd və məlumatlar əsasında 2025-ci ilin fevralında Milan Respublika Baş Prokurorluğuna şikayət etmişdi. Qavazzeninin şikayətini araşdıran baş prokurorluq Bosniya müharibəsi zamanı İtaliyadan həftəsonu turları ilə Sarayevoya gedərək əyləncə məqsədilə serb snayperlərinə yüksək məbləğdə pul verib bosniyalı mülki şəxslərə atəş açan şəxslərə qarşı 2025-ci ilin noyabrında təhqiqat başlatmışdı.
Sarayevo mühasirəsində "insan ovlayan" snayperlər
Bosniya və Herseqovinada 1992–1995-ci illərdə baş verən müharibə zamanı paytaxt Sarayevoda serb snayperlərin mülki şəxsləri hədəf aldığına dair 2021-ci ildə bəzi yeni görüntülər ortaya çıxmışdı. Sözügedən görüntülər bosniyalılara keçmişin ağrılı günlərini xatırladıb.
Xatırladaq ki, Sarayevo 6 aprel 1992-ci ildə hücuma məruz qalıb. Serb birləşmələri tərəfindən mühasirəyə alınan və hər gün bombalanan şəhərdə 3,5 illik mühasirə müddətində 1601-i uşaq olmaqla, 11 541 mülki şəxs həyatını itirib, şəhərdəki tarixi və mədəni abidələrə, eləcə də infrastruktura ciddi ziyan dəyib.
