Azərbaycanla birgə 9 dövlət "Sülh Şurası"na 7 milyard dollar ayırmağa razılaşıb - Tramp açıqladı
ABŞ Prezidenti Donald Tramp "Sülh Şurası"nın ilk təsis iclasında qurumun doqquz üzvünün Qəzzaya yardım paketi üçün 7 milyard dollar məbləğində vəsait ayırmağa razılaşdığını elan edib.
AFN.az-ın xəbərinə görə, ABŞ prezidenti əlavə edib ki, bu yardımı öhdəsinə götürən ölkələr Azərbaycan, Qazaxıstan, BƏƏ, Mərakeş, Bəhreyn, Qətər, Səudiyyə Ərəbistanı, Özbəkistan və Küveytdir.
Donorlara təşəkkür edən Tramp bildirib ki, xərclənən hər dollar regionda sabitliyə, yeni və harmonik gələcəyə yatırılan bir investisiyadır. Qeyd olunan məbləğ əhəmiyyətli olsa da, iki il davam edən müharibədən sonra darmadağın olmuş Fələstin anklavının bərpası üçün tələb olunan təxminən 70 milyard dolların yalnız kiçik bir hissəsini təşkil edir.
Donald Tramp həmçinin ABŞ-ın "Sülh Şurası" üçün 10 milyard dollar vəsait ayırdığını elan etsə də, bu məbləğin konkret olaraq hansı məqsədlər üçün istifadə ediləcəyini dəqiqləşdirməyib. "Sülh Şurası daha yaxşı bir gələcəyin necə qurulacağını məhz bu otaqdan başlayaraq göstərir" - deyə Tramp çıxışını tamamlayıb.
