ABŞ: Venesuela neftinin Kubaya təkrar satışına verilən icazə Havana rəsmilərinə şamil olunmayacaq
Amerika Birləşmiş Ştatlarının Venesuela neftinin Kubaya təkrar satışına dair verdiyi icazə Havana hakimiyyətini əhatə etməyəcək.
AFN.az xarici mediaya istinadən xəbər verir ki, bu barədə izahat ABŞ Maliyyə Nazirliyinin Xarici Aktivlərə Nəzarət İdarəsi (OFAC) tərəfindən verilib. Qurumun bəyanatında qeyd olunur ki, ABŞ qanunları və siyasətinə uyğun gələn bu əlverişli lisenziyalaşdırma siyasəti Kubanın Silahlı Qüvvələri, kəşfiyyat xidmətləri və ya Dövlət Departamentinin məhdudlaşdırıcı siyahısında olan digər hökumət institutları ilə əlaqəli fiziki və hüquqi şəxslərin iştirakı ilə həyata keçirilən əməliyyatlara şamil edilmir.
Maliyyə Nazirliyi Venesuela neftinin Kubaya təkrar satışı ilə bağlı sövdələşmələri yalnız müəyyən şərtlər daxilində təsdiqləyəcəyini elan edib. İdarənin bildirdiyinə görə, bu siyasət Kuba xalqını, o cümlədən ölkənin özəl sektorunu dəstəkləyən əməliyyatlara yönəlib. Bura nümunə kimi Kubada kommersiya və humanitar məqsədlər üçün nəzərdə tutulan ixrac əməliyyatları göstərilir.
Vaşinqtonun bu addımı adada kəskin enerji çatışmazlığı yaşayan mülki əhalinin və müstəqil sahibkarların vəziyyətini yüngülləşdirmək məqsədi daşıyır. Bununla belə, sanksiya rejiminin sərt qaydaları hələ də qüvvədə qalır və neft ticarətindən əldə olunan gəlirlərin Kuba hökumətinin və hərbi strukturlarının nəzarətinə keçməməsi üçün ciddi monitorinq aparılacağı vurğulanır.
