Ekvadorda 10 əyalətdə fövqəladə vəziyyət elan edilib
Ekvador Prezidenti Daniel Noboa artan təhlükəsizlik problemləri və ciddi daxili iğtişaşlar səbəbindən 10 əyalət və 3 qəsəbədə fövqəladə vəziyyət elan edib.
AFN.az xəbər verir ki, ölkənin milli mətbuatında dərc olunan xəbərlərə görə, Prezident Noboanın imzaladığı fərman çərçivəsində ciddi daxili qarışıqlıqlar əsas gətirilərək sözügedən bölgələrdə 60 gün müddətinə fövqəladə vəziyyət rejiminin tətbiq olunmasına qərar verilib.
Sənəddə qeyd olunub ki, fövqəladə vəziyyət təhlükəsizlik qüvvələrinə daxili təhlükəsizliyi təmin etmək, ictimai asayişi və vətəndaşların təhlükəsizliyini yenidən bərpa etmək, qorumaq və nəzarətdə saxlamaq məqsədilə həmin ərazilərə müdaxilə etmək səlahiyyəti verir.
Bu tənzimləmənin xalqın hüquq, azadlıq və təminatlarından istifadəsinə mənfi təsir göstərən hər cür cinayət və qanunsuz fəaliyyətlərin qarşısının alınması, onlarla mübarizə aparılması və onların zərərsizləşdirilməsi məqsədi daşıdığı ifadə edilib.
Fərman mənzil toxunulmazlığı hüququnu da dayandıraraq təhlükəsizlik qüvvələrinə qanunsuz fəaliyyət göstərilməsindən şübhələnilən xüsusi mülklərə müdaxilə etmək və həmin evlərə daxil olmaq imkanı yaradır.
Prezident Noboa bundan əvvəl də artan zorakılıq hadisələrini əsas gətirərək müxtəlif dövrlərdə üç dəfə fövqəladə vəziyyət elan etmişdi.
Daxili İşlər Nazirliyinin məlumatına görə, Ekvador təxminən 9 min 300 qətl hadisəsi ilə 2025-ci ili rekord səviyyədə qətl sayı ilə başa vurub və bu göstərici ölkəni qətl nisbətinə görə Latın Amerikasında ən üst sıralara çıxarıb.
