Brent neftinin bir barreli 84,33 dollardan satılır
Brent markalı neftin bir barrelinin qiyməti beynəlxalq əmtəə birjalarında 84,33 dollara yüksəlib.
AFN.az xəbər verir ki, ötən gün 85,60 dollara qədər bahalaşan Brent neftinin oktyabr fyuçersləri üzrə bir barrelinin qiyməti ticarət sessiyasını 82,08 dollardan başa vurub.
Bu gün saat 10:44-ə olan məlumata əsasən, Brent neftinin bir barreli bağlanış qiyməti ilə müqayisədə 2,74 faiz bahalaşaraq 84,33 dollara yüksəlib. Həmin vaxt WTI markalı xam neftin sentyabr fyuçersləri üzrə bir barrelinin qiyməti isə 81,82 dollar olub.
Qiymət artımına ABŞ və Səudiyyə Ərəbistanının İraqda həyata keçirdiyi hava zərbələri, həmçinin İranın Yaxın Şərqdə yerləşən ABŞ qüvvələrinə qarşı ballistik raket hücumu nəticəsində regionda gərginliyin artması təsir göstərib.
ABŞ Mərkəzi Komandanlığı (CENTCOM) ABŞ və Səudiyyə Ərəbistanı Silahlı Qüvvələrinin İraqın şərqində İranın dəstəklədiyi qruplara məxsus hədəflərə hava zərbələri endirdiyini açıqlayıb.
Səudiyyə Ərəbistanı Müdafiə Nazirliyi isə ölkənin Şərq bölgəsi və Ər-Riyadda yerləşən neft obyektlərini hədəf alan çoxsaylı pilotsuz uçuş aparatlarının hava hücumundan müdafiə sistemləri tərəfindən məhv edildiyini, hücumların İraq ərazisindən İranın dəstəklədiyi qruplar tərəfindən həyata keçirildiyini bildirib.
CENTCOM daha əvvəl İran İnqilab Keşikçiləri Korpusunun Yaxın Şərqdəki ABŞ qüvvələrinə qarşı çoxsaylı ballistik raket buraxdığını, raketlərin hamısının zərərsizləşdirildiyini açıqlamışdı.
Bu hadisələr regionda gərginliyin yaxın vaxtlarda azalacağına dair gözləntiləri zəiflədərək qlobal neft bazarında təklif təhlükəsizliyi ilə bağlı narahatlıqları artırıb.
Ötən həftə Hörmüz və Babülməndəb boğazlarında neft daşımaları ilə bağlı risklərin artması və Yaxın Şərqdə enerji infrastrukturuna mümkün hücumlar səbəbindən bahalaşan Brent nefti ABŞ ilə İran arasında qarşılıqlı hücumların dayanmasından sonra dünən 80,67 dollara qədər ucuzlaşmışdı.
Mütəxəssislər bildirirlər ki, Hörmüz və Babülməndəb boğazlarında tanker hərəkəti hələ də adi səviyyədən aşağıdır. Bununla yanaşı, İran və Oman arasında Hörmüz boğazında dəniz nəqliyyatının təhlükəsiz şəkildə bərpası ilə bağlı aparılan danışıqlar diqqətlə izlənilir.
İran xarici işlər nazirinin müavini Kazım Qəribabadi dövlət televiziyasına açıqlamasında Omanla aparılan danışıqlarda Hörmüz boğazındakı dəniz marşrutlarından birinin tam, digərinin isə qismən İranın nəzarətində olması təklifinin irəli sürüldüyünü bildirib.
Qəribabadi daha əvvəl Hörmüz boğazının cənubundakı gəmiçilik marşrutunun İran və Oman arasında danışıqlar başa çatanadək açıq saxlanılması təklifini qəbul etmədiklərini də açıqlamışdı.
Xatırladaq ki, Omandan nümayəndə heyəti iyulun 24-də Hörmüz boğazında gəmi hərəkətinin idarə olunması mexanizmini müzakirə etmək üçün Tehrana səfər edib.
Digər tərəfdən, Amerika Neft İnstitutu ABŞ-ın kommersiya məqsədli xam neft ehtiyatlarının ötən həftə əvvəlki həftə ilə müqayisədə 3 milyon 296 min barrel artdığını açıqlayıb. Bazar iştirakçıları isə ehtiyatların 2 milyon 500 min barrel azalacağını gözləyirdilər.
ABŞ Enerji İnformasiya Administrasiyasının gün ərzində rəsmi ehtiyat göstəricilərini açıqlaması gözlənilir.
Analitiklərin fikrincə texniki baxımdan Brent neftində 87,71 dollar müqavimət, 79,96 dollar isə dəstək səviyyəsi kimi izlənilə bilər.
