Brent nefti 89,50 dollar səviyyəsində ticarət olunur
Brent markalı neftin bir barrelinin qiyməti beynəlxalq bazarlarda 89,50 dollar səviyyəsində ticarət edilir.
AFN.az xəbər verir ki, ötən gün 90 dolları ötən Brent neftinin oktyabr fyuçersləri üzrə bir barrelinin qiyməti günü 88,09 dollar səviyyəsində başa vurub.
Bu gün Bakı vaxtı ilə saat 10:32 vəziyyətinə Brent markalı neftin bir barreli əvvəlki bağlanış qiyməti ilə müqayisədə 1,6 faiz bahalaşaraq 89,50 dollara yüksəlib. Eyni vaxtda WTI markalı xam neftin sentyabr fyuçersləri üzrə bir barreli isə 85,82 dollardan alıcı tapıb.
Neft qiymətlərindəki artıma ABŞ Prezidenti Donald Trampın Misirdə ABŞ-a məxsus LNG tankerinə pilotsuz uçuş aparatı ilə edilən hücuma çox sərt cavab veriləcəyini açıqlaması, Vaşinqtonun İrana qarşı yeni sanksiyalar tətbiq etməsi və Tehranın Hörmüz boğazı ilə bağlı sərt bəyanatları fonunda Yaxın Şərqdə tədarük təhlükəsizliyi ilə bağlı narahatlıqların artması təsir göstərib.
Donald Tramp Ağ Evdə keçirdiyi mətbuat konfransında ABŞ-a məxsus LNG tankerinə edilən hücumun cavabsız qalmayacağını bildirib. Hücumun İran tərəfindən təşkil olunub-olunmaması ilə bağlı suala cavabında o, məsələ barədə məlumatlandırıldığını və araşdırmaların davam etdiyini deyib.
Tramp İranla bağlı açıqlamasında "Onlara çox ağır zərbə endirəcəyik. Bunun baş verəcəyini bilirlər, lakin qarşısını ala bilməyəcəklər" ifadələrini işlədib. O, hücumun başqa bir qrup tərəfindən həyata keçirildiyini və həmin qrupun üzr istədiyini desə də, buna cavab verməyin zəruri olduğunu vurğulayıb.
ABŞ prezidentinin sözlərinə görə, Vaşinqton Yaxın Şərqdəki hərbi mövcudluğunu davam etdirəcək və amerikalı hərbçilərə, eləcə də hərbi obyektlərə qarşı hücumlar səbəbindən regiondan geri çəkilmək gündəmdə deyil.
Digər tərəfdən, ABŞ Mərkəzi Komandanlığı (CENTCOM) Yaxın Şərqdəki Amerika qüvvələrinə qarşı raket hücumlarına cavab olaraq İrana qarşı genişmiqyaslı hücum dalğası həyata keçirildiyini açıqlayıb.
Buna cavab olaraq İran İnqilab Keşikçiləri Korpusu ABŞ-ın təhdidləri və bölgədəki dəniz nəqliyyatına müdaxilələri davam etdiyi müddətdə Hörmüz boğazının yenidən açılmayacağını bəyan edib.
Açıqlamada ABŞ təyyarələrinin istiqamətləndirməsi ilə iki neft tankerinin gecə saatlarında Hörmüz boğazının cənubunda təhlükəsiz hesab edilməyən marşrutdan keçməyə cəhd etdiyi, tankerlərdən birində yanğın baş verdikdən sonra hər iki gəminin geri döndüyü iddia olunub.
İran İnqilab Keşikçiləri Korpusu həmçinin Hörmüz boğazının onların nəzarətində olduğunu bildirərək bölgədəki dəniz nəqliyyatına kənar müdaxiləyə imkan verilməyəcəyini vurğulayıb.
ABŞ-ın yeni sanksiyaları, FED-in qərarı və ehtiyat göstəriciləri də neft qiymətlərini dəstəkləyib.
ABŞ administrasiyası İranın Hörmüz boğazı vasitəsilə gəlir əldə etməsinə kömək etdiyi bildirilən iki şirkəti, həmçinin İran nefti və neft-kimya məhsullarının daşınmasında iştirak etdiyi qeyd olunan 8 gəmi və onlarla əlaqəli 8 şirkəti sanksiyalar siyahısına daxil edib.
Bazar iştirakçıları hesab edirlər ki, bu sanksiyalar İranın neft ixracını çətinləşdirə və geosiyasi risk mükafatını artıra bilər. Lakin faktiki tədarük itkisi baş vermədiyi halda qiymətlərə təsirin məhdud qalacağı ehtimal olunur.
Neft bazarına dəstək verən digər amil isə ABŞ Federal Ehtiyat Sisteminin (FED) uçot dərəcəsini gözləntilərə uyğun olaraq 3,50-3,75 faiz intervalında sabit saxlaması olub.
FED-in faizləri artırmamasından sonra sentyabr ayında faiz artımı gözləntiləri zəifləyib. Analitiklər hesab edirlər ki, daha aşağı faiz gözləntiləri iqtisadi aktivliyi və enerji tələbatını dəstəkləyərək neft qiymətlərinin yüksəlməsinə şərait yaradır.
Bundan başqa, ABŞ-ın kommersiya məqsədli xam neft ehtiyatlarının ötən həftə bazar proqnozlarının əksinə olaraq 7,2 milyon barrel azalması da bazarda tələbatın yüksək olduğunu göstərərək qiymətlərə müsbət təsir edib.
ABŞ Enerji İnformasiya Administrasiyasının (EIA) məlumatına görə, ölkənin kommersiya məqsədli xam neft ehtiyatları ötən həftə 7,2 milyon barrel azalaraq 404,5 milyon barrelə enib. Halbuki bazar iştirakçıları ehtiyatların təxminən 700 min barrel artacağını gözləyirdilər.
