Belçikada ölkə üzrə isti hava xəbərdarlığı elan edilib
Belçikada temperaturun yenidən yüksəlməsi səbəbilə ölkənin bütün ərazisində bazar gününədək isti hava xəbərdarlığı elan edilib.
AFN.az xəbər verir ki, Belçika Kral Meteorologiya İnstitutunun proqnozlarına görə, bu gün ölkənin daxili bölgələrində temperatur yenidən 30 dərəcədən yuxarı qalxacaq.
Yağıntı gözlənilmədiyi halda temperaturun sahilyanı ərazilərdə 29 dərəcəyə, daxili bölgələrdə isə 33 dərəcəyə çatacağı bildirilir.
İsti hava səbəbilə bazar gününədək ölkənin bütün ərazisində sarı xəbərdarlıq qüvvədə olacaq.
Cümə axşamından etibarən Flamand bölgəsinin tamamında, Valon Brabant və Liejdə bir üst səviyyə olan narıncı xəbərdarlığa keçiləcək.
Cümə axşamı Belçikanın bir çox bölgəsində temperaturun 35 dərəcəyə çatacağı gözlənilir.
Cümə günü də isti havanın təsirini davam etdirəcəyi və ölkənin mərkəzi bölgələrində temperaturun 35 dərəcə ətrafında olacağı proqnozlaşdırılır.
Sahilyanı ərazilər və ölkənin dağlıq bölgələrində temperaturun 30 dərəcə ətrafında olacağı təxmin edilir.
Belçikada isti hava xəbərdarlığı yüksək risk yaradan ekstremal isti hava şəraitini ifadə edir. Bu səviyyədə vətəndaşların tədbir görməsi, yerli idarələrin isə hazırlıqlı olması tələb olunur. Xəbərdarlıq çərçivəsində günün ən isti saatlarında çölə çıxmamaq, bol su içmək və ağır fiziki fəaliyyətlərdən çəkinmək tövsiyə edilir.
