Ferrari-nin ilk elektrikli avtomobili hərracda 40 milyon dollara satıldı
Ferrari-nin tam elektriklə işləyən ilk modeli Luce-un xüsusi dizaynı hərracda 40 milyon dollara satılaraq indiyədək satılan ən bahalı yeni avtomobil rekordunu qırıb.
AFN.az xəbər verir ki, İtaliyanın lüks idman avtomobili istehsalçısının “Chassis 0” adlandırdığı xüsusi istehsal modeli ABŞ-nin Kaliforniya ştatında keçirilən Monterey Avtomobil Həftəsi çərçivəsində təşkil olunan xeyriyyə hərracında alıcı tapıb.
Hərrac evi RM Sotheby's avtomobilin ilkin olaraq 1,1 milyon dollar dəyərində qiymətləndirildiyini, lakin bu məbləğin 36 qatına satıldığını açıqlayıb.
İtalyanca “işıq” mənasını verən Luce may ayında təqdim edildikdə Ferrari-nin ənənəvi kəskin xətlərindən fərqlənən qabarcıq formalı dizaynına görə bəzi pərəstişkarların reaksiyasına səbəb olmuşdu. Təqdimatdan sonra şirkətin Milan birjasındakı səhmləri 8 faizdən çox ucuzlaşmışdı.
Ferrari USA tərəfindən verilən açıqlamada əldə olunan bütün gəlirin təhsil fəaliyyətlərini dəstəkləmək məqsədilə Ferrari Fonduna köçürüləcəyi bildirilib.
Dörd təkərinin hər birində ayrıca elektrik mühərriki olan “Chassis 0” işığın düşmə bucağından asılı olaraq yaşıldan bənövşəyi rəngə dəyişən xüsusi sədəfli xarici örtüyə və Perla Le Mans metalik dəri interyerə malikdir. Avtomobilin Maranellodakı zavodda tamamlandıqdan sonra 2027-ci ilin ilk rübündə adı açıqlanmayan sahibinə təhvil veriləcəyi bildirilib.
May ayında təqdim edilən və 550 min avro başlanğıc qiyməti ilə satışa çıxarılan standart Luce modellərinin tədarükünə isə 2026-cı ilin son rübündə başlanması gözlənilir.
