Almaniyada həddindən artıq istilərin iqtisadi zərəri 36 milyard avronu keçib
Almaniyada bu il təsirli olan həddindən artıq isti və quraqlığın ölkə iqtisadiyyatına vurduğu zərərin ən azı 36 milyard avro olduğu bildirilib.
AFN.az xəbər verir ki, beynəlxalq ekoloji təşkilat Greenpeace “Həddindən artıq isti yay mövsümünün Almaniyaya dəyəri” adlı təhlilini açıqlayıb.
Təhlildə kənd təsərrüfatında məhsuldarlıq itkiləri, meşə yanğınları, səhiyyə xərclərinin artması və istehsalın azalması kimi amillərin Almaniya iqtisadiyyatına ən azı 36 milyard avro zərər vurduğu bildirilib.
Bu məbləğin ölkənin ümumi daxili məhsulunun 0,8-0,9 faizinə bərabər olduğu hesablanıb.
İsti hava dalğası səbəbindən ən böyük maliyyə itkisi biznes və istehsal proseslərində yaşanıb. Yay ərzində qeydə alınan təxminən 25 həddindən artıq isti gün işçi qüvvəsinin məhsuldarlığının azalmasına və istehsalın dayanmasına səbəb olaraq iqtisadiyyata birbaşa 10 milyard 800 milyon avro zərər vurub.
Bunun ardınca quraqlıq stresi və yanğınlar səbəbindən meşə ehtiyatlarına dəyən 5 milyard-7 milyard 500 milyon avro həcmində zərər və həddindən artıq istilər nəticəsində insan itkilərinin səhiyyə iqtisadiyyatı baxımından yaratdığı 6 milyard 900 milyon avroluq xərc gəlib.
Quraqlıq səbəbindən kənd təsərrüfatı sektorunda 3 milyard 400 milyon avro itki yaranıb. Məktəblərdə yüksək temperatur səbəbindən öyrənmə səmərəliliyinin azalmasının təhsil sisteminə yaratdığı xərc isə 3 milyard 200 milyon avro olaraq qiymətləndirilib.
Reyn çayında su səviyyəsinin rekord həddə azalması və daxili su yolu daşımalarının pozulması isə logistika və sənaye istehsalına 3 milyard 400 milyon-4 milyard 500 milyon avro arasında əlavə yük gətirib.
Greenpeace rəsmiləri məlumat axınının yetərsiz olması səbəbindən bəzi sahələrin hesablamaya daxil edilə bilmədiyini, buna görə də 36 milyard avroluq ümumi zərərin əslində mühafizəkar minimum hədd kimi qəbul edilməli olduğunu bildiriblər.
Greenpeace-in maliyyə üzrə eksperti Maurisio Varqas da bu yay yaşanan isti və quraqlığın milyonlarla insan və ölkə iqtisadiyyatı üçün fəlakət olduğunu bildirərək Almaniya hökumətinin iqlim böhranına qarşı təcili və ciddi addımlar atmalı olduğunu vurğulayıb.
