8 yaşlı qız uşağı nadir rast gəlinən beyin yeyən amöb səbəbindən ölüb
ABŞ-nin Luiziana ştatında 8 yaşlı qız uşağı ilıq şirin suda olan son dərəcə nadir beyin yeyən amöbə yoluxduqdan sonra həyatını itirib.
AFN.az xəbər verir ki, Lillian Smart “Naegleria fowleri” infeksiyası diaqnozu qoyulduqdan sonra həftəsonu vəfat edib.
Səhiyyə orqanları bu mikroorqanizmi ABŞ ərazisindəki şirin sularda yayılan, burundan daxil olaraq demək olar ki, hər zaman ölümcül infeksiyaya səbəb olan beyin yeyən amöb kimi xarakterizə edir.
ABŞ-da ildə orta hesabla 10-dan az belə hal qeydə alınır.
Anası və atası Daniel və Rebekka Smart bazar günü sosial mediada etdikləri açıq paylaşımda Lillianın həyatını itirdiyini bildirərək, beynindəki zədənin onun kiçik bədəninin sağalması üçün çox ağır olduğunu və hər kəsin onu həyatda saxlamaq üçün əlindən gələni etdiyini yazıblar.
Luiziana Səhiyyə Departamenti ötən həftə ştatda 2013-cü ildən bəri ilk təsdiqlənmiş “Naegleria fowleri” infeksiyasının qeydə alındığını açıqlayıb. Departamentin sözçüsü Steysi Qrou Smartın adını açıqlamayan qurumun ayrı-ayrı hallar və ya konkret xəstələr barədə şərh vermədiyini bildirib.
Luiziana qubernatoru Ceff Landri X hesabında Lillianın ölüm xəbərindən dolayı sarsıldığını bildirib.
Luiziana Səhiyyə Departamenti infeksiyanın böyük ehtimalla Luiziananın şimalındakı Kleyborn gölündə üzgüçülük zamanı keçdiyini açıqlayıb.
Amöb daşıyan suyun burundan yuxarı qalxaraq beyinə çatması ilkin amöb meningoensefaliti kimi tanınan ölümcül infeksiyaya səbəb ola bilər.
Səhiyyə Departamentinin məlumatına görə, 1937-2025-ci illər arasında ABŞ-da cəmi təxminən 180 təsdiqlənmiş infeksiya halı qeydə alınıb və bu halların demək olar ki, hər zaman ölümlə nəticələndiyi bildirilib. İnfeksiya insandan insana keçmir.
“Naegleria fowleri” ABŞ ərazisindəki ilıq şirin su göllərində, çaylarda, kanallarda və gölməçələrdə mövcuddur. Amöb suyun temperaturu 77 Farenheyt dərəcəsindən yuxarı olduqda təhlükəli hala gəlir və uzun illər ərzində demək olar ki, yalnız ölkənin cənub bölgələrində yay aylarında müşahidə edilib.
Alimlər son dövrlərdə Merilend, İndiana və Minnesota ştatlarında da bir neçə belə halın qeydə alındığını bildiriblər.
Luiziana Səhiyyə Departamenti amipin təbii olaraq mövcud olduğunu və su hövzələrində “Naegleria fowleri” üçün müntəzəm ekoloji testlərin aparılmadığını bildirib.
Ötən il Cənubi Karolinada 12 yaşlı uşaq da amip səbəbli infeksiya nəticəsində həyatını itirmişdi.
