Almaniyada müdafiə şirkətinin tikinti sahəsinə yandırıcı maddələr atıldı
Almaniyanın Münhen şəhərində müdafiə və təhlükəsizlik texnologiyaları istehsal edən Rohde & Schwarz şirkətinin baş qərargahının qarşısındakı tikinti sahəsinə gecə yarısı hərəkətdə olan avtomobildən yandırıcı maddələr atılıb.
Şahidlərin məlumatı əsasında əraziyə gələn polis əməkdaşları konteynerlərin yaxınlığında başlayan yanğını böyümədən söndürüblər. Hadisə nəticəsində xəsarət alan olmayıb, tikinti sahəsində partlamamış daha bir yandırıcı maddə aşkar edilərək bomba zərərsizləşdirmə mütəxəssisləri tərəfindən zərərsizləşdirilib.
AFN.az xəbər verir ki, Bavariya polisi siyasi motiv ehtimalı ilə yandırma cəhdinə dair Bavariya Əyalət Kriminal İdarəsi (LKA) tərəfindən araşdırma başladıldığını açıqlayıb.
Hadisədən sonra aparılan axtarış əməliyyatı zamanı yaxınlıqdakı yanacaqdoldurma məntəqəsində xarici ölkə vətəndaşı olan iki şübhəli saxlanılıb. Rohde & Schwarz şirkətinin sözçüsü əməliyyatı təsdiqləyərək şirkət binalarının hadisədən zərər görmədiyini bildirib. Eyni şirkətin yaxınlığında 2021-ci ildə də sabotaj törədilmiş və faili müəyyən edilməyən həmin əməlin müdafiə sənayesi fəaliyyətlərini hədəf aldığı iddia edilmişdi.
Sözügedən yandırma cəhdi Almaniya hakimiyyətinin kritik infrastruktur obyektlərinə qarşı hücumlarla bağlı yüksək hazırlıq vəziyyətinə keçdiyi bir dövrdə baş verib. Almaniyanın Leypsiq-Halle hava limanında avqustun 4-də Ukraynaya məxsus yük təyyarəsinin yaxınlığında partlayıcı qurğu daşıdığı ehtimal edilən PUA aşkarlanmışdı.
ABŞ kəşfiyyatı aşkar edilən partlayıcı yüklü PUA-nın xüsusiyyətlərinin Rusiya hərbi kəşfiyyatına “xas” olduğunu iddia etmişdi.
Almaniya hökuməti dünən hadisə ilə bağlı aparılan araşdırmada əldə edilən nəticələrin Rusiyanı məsul göstərdiyini bildirərək bir sıra tədbirlər açıqlamışdı.
