Aİ-dən müharibə cinayətkarı Mladiçin dəfn mərasiminə sərt reaksiya
Avropa İttifaqı (Aİ) Srebrenitsa Soyqırımının əsas məsul şəxslərindən olan Ratko Mladiç üçün Serbiyada keçirilən dəfn mərasimində yüksək səviyyəli serb rəsmilərinin iştirakına sərt reaksiya verib.
AFN.az xəbər verir ki, Aİ Şurasının sədri Antonio Koşta və Avropa Komissiyasının prezidenti Ursula fon der Leyen Bosniya və Herseqovinanın şərqində yerləşən Srebrenitsada 1995-ci ilin iyulunda bosniyalılara qarşı törədilən soyqırımda təqsirli bilinən müharibə cinayətkarı Mladiçin cəsədinin Serbiyada rəsmi mərasimlə dəfn edilməsindən sonra X platformasındakı hesablarından eyni vaxtda eyni mesajı paylaşıblar.
Mladiçin dəfni ilə bağlı görüntüləri şokedici kimi qiymətləndirən iki Aİ lideri onun soyqırım, müharibə cinayətləri və insanlığa qarşı cinayətlərdə təqsirli bilinmiş müharibə cinayətkarı olduğunu xatırladıblar.
Koşta və fon der Leyen dəfn mərasimində rəsmi dəstəyə işarə edən elementlərin olmasının və yüksək səviyyəli serb rəsmilərinin mərasimdə iştirak etməsinin dərindən üzücü olduğunu bildiriblər.
Paylaşımda bu vəziyyətin Avropanın yaxın tarixinin qaranlıq dövrü ilə üzləşməkdə uğursuzluğunu göstərdiyi və Serbiyanın Aİ-yə üzvlük prosesinin əsasını təşkil edən dəyərlərlə uyğun gəlmədiyi vurğulanıb.
İki lider keçmiş Yuqoslaviyadakı müharibələr zamanı törədilən cinayətlərin bütün qurbanları və həlak olanların yaxınları ilə həmrəy olduqlarını ifadə ediblər.
Ratko Mladiç 1942-ci ildə Bosniya və Herseqovinanın şərqindəki Kalinovik yaxınlığında yerləşən Bozanoviçi kəndində anadan olub. Hərbi təhsilini Belqradda alıb və Yuqoslaviya Xalq Ordusunda (JNA) aktiv xidmət edib.
1992-ci ilin mayında Bosniya və Herseqovinada yeni yaradılan Serb Respublikası Ordusunun Baş Qərargah rəisi təyin edilib və 1996-cı ilə qədər bu vəzifədə qalıb.
Keçmiş Yuqoslaviya üzrə Beynəlxalq Cinayət Tribunalı (ICTY) tərəfindən ilk dəfə 24 iyul 1995-ci ildə haqqında ittiham aktı hazırlanan Mladiç Bosniya və Herseqovinadakı müharibədən sonra Serbiyaya qaçaraq təxminən 16 il gizlənib.
Serbiya rəsmilərinin Mladiçi tapa bilmədikləri barədə açıqlamalarına baxmayaraq, onun illər ərzində dövlət qurumlarında çalışan bəzi şəxslər tərəfindən qorunduğu barədə iddialar gündəmə gəlib.
Yerli televiziya proqramında yayımlanan görüntülərdə Mladiçin axtarıldığı dövrdə izdihamlı məkanlarda insanlarla görüşdüyü, əyləndiyi və fotoşəkil çəkdirdiyi görülüb.
Mladiç 26 may 2011-ci ildə Serbiyanın Zrenyanin şəhəri yaxınlığındakı Lazarevo kəndində yaxalanıb və 31 may 2011-ci ildə Haaqaya göndərilib.
Məhkəməsi 16 may 2012-ci ildə başlayan Mladiç ona qarşı irəli sürülən ittihamları qəbul etməyib.
Mladiç xüsusilə 1995-ci ilin iyulunda 8 min 372 bosniak mülki şəxsin qətlə yetirildiyi Srebrenitsa Soyqırımının əsas məsul şəxsi və təhrikçisi hesab edilirdi.
Niderlandın Haaqa şəhərində saxlanıldığı həbsxanada son zamanlar ciddi sağlamlıq problemləri yaşayan Mladiç 27 avqustda ölüb.
Mladiçin cəsədi sentyabrın 7-də Serbiyanın paytaxtı Belqradda çox sayda serb rəsmisinin iştirakı ilə rəsmi mərasimlə dəfn edilib. Serbiyanın müharibə cinayətkarı üçün rəsmi dəfn mərasimi təşkil etməsi etirazlara səbəb olub.
