BVF-dən Böyük Britaniya və ABŞ-a borc xəbərdarlığı
Beynəlxalq Valyuta Fondu inkişaf etmiş iqtisadiyyatların artan borclanma xərclərinin öhdəsindən gəlmək üçün təcili şəkildə borclanmanı azaltmalı və maliyyə intizamını gücləndirməli olduğunu bildirib.
AFN.az xəbər verir ki, BVF-in rəhbəri Kristalina Georgiyeva Nyu-Yorkda BMT Baş Assambleyasının toplantısı çərçivəsində çıxış edərək qlobal iqtisadi şokların borc səviyyələrini artırdığını və hökumətlərin bu xərcləri nəzarət altına almaq üçün kifayət qədər addım atmadığını deyib. Georgiyeva siyasətçilərin zəruri tədbirləri görmək üçün cəsarət nümayiş etdirməli olduğunu vurğulayıb.
Artan borclanma xərcləri neft tədarükünü pozan müharibələrin inflyasiyanı artırması fonunda sürətlənib. Böyük Britaniyada avqust ayında borclanma rəsmi proqnozları üstələyib, borc üzrə faiz ödənişləri isə 1997-ci ildən bəri avqust ayı üçün ən yüksək səviyyəyə çatıb. ABŞ-da isə ümumi borcun həcmi 40 trilyon dolları keçib.
Georgiyeva hökumətlərin xarici amillərə nəzarət edə bilməsə də, daxili siyasəti idarə edə biləcəyini bildirib. O, maliyyə konsolidasiyasının prioritetə çevrilməsinin vacibliyini qeyd edib.
BVF rəhbəri həmçinin süni intellektə yatırımların istiqraz bazarında rəqabəti artıraraq istiqraz gəlirlərini yüksəltdiyinə diqqət çəkib. Georgiyeva süni intellektin nəzarətdən çıxmasının maliyyə sabitliyi üçün ciddi risk yarada biləcəyi barədə xəbərdarlıq edib.
