Avropa Mərkəzi Bankı: Bazarlar şoklara qarşı həssas olaraq qalır
Avropa Mərkəzi Bankı xəbərdarlıq edib ki, inflyasiyanın aşağı düşməsinə və iqtisadi perspektivlərin yaxşılaşmasına baxmayaraq, maliyyə bazarları geosiyasi gərginliyin artması kimi mənfi şoklara qarşı həssas olaraq qalır.
Avropa Mərkəzi Bankının (AMB) Avro Bölgəsi üzrə “Maliyyə Sabitliyinin Qiymətləndirilməsi” hesabatında, inflyasiyanın aşağı düşməsi və iqtisadi gözləntilərin yaxşılaşması sayəsində iqtisadi mənzərənin sabitləşməsinə baxmayaraq, maliyyə bazarlarının mənfi şoklara qarşı həssas qaldığına diqqət çəkilib.
Hesabatda son vaxtlar bazarlarda müşahidə edilən optimist atmosferin sürətlə dəyişə biləcəyi vurğulanıb və geosiyasi gərginliyin maliyyə sabitliyini təhlükə altına sala biləcəyi xəbərdarlığı edilib.
"Sərt maliyyə şərtləri Avrozona ev təsərrüfatlarının, firmaların və hökumətlərin dayanıqlığını sınayır, əmlak bazarındakı tənəzzül isə daşınmaz əmlak firmalarına gərginlik yaradır" deyə qeyd edilib.
Hesabatda Avro Bölgəsi bank sisteminin güclü kapital və likvidlik mövqeyi sayəsində bu riskləri idarə etmək üçün yaxşı təchiz edildiyi, lakin bankların aşağı bazar qiymətləndirmələri, xüsusilə aktiv keyfiyyəti, maliyyələşdirmə və gəlirləri ilə bağlı çətinliklərin davam etdiyi vurğulanıb.
Hesabatda bəzi kredit portfellərində, xüsusilə də kommersiya daşınmaz əmlakının maliyyələşdirilməsində itkilərin artması əlamətlərinin olduğu bildirilib və faiz dərəcələri aşağı düşsə belə, maliyyə qurumlarının maliyyə xərclərinin yüksək olaraq qalması ehtimalı qeyd edilib.
Hesabatı təqdim edən AMB-nin vitse-prezidenti Luis de Guindos mənfi iqtisadi və maliyyə sürprizləri ehtimalının yüksək olduğunu ifadə edərək, "Avro bölgəsinin maliyyə sabitliyi üçün risk proqnozu kövrək olmağa davam edir" deyib.
De Guindos, "Maliyyə sabitliyi şərtləri tənəzzül risklərinin azalması və inflyasiyanın azalması ilə paralel olaraq yaxşılaşsa da, qlobal iqtisadi və geosiyasi qeyri-müəyyənliklər fonunda maliyyə sisteminin dayanıqlığını daha da artırmağımız vacib olaraq qalır" ifadələrini işlədib.
