Lula da Silva: Braziliya heç kimin arxa bağçası deyil
Braziliyada prezident seçkilərinin qeyri-rəsmi nəticələrinə əsasən qalib gələn 81 yaşlı Luis İnasio Lula da Silva ölkəsinin heç kimin arxa bağçası olmadığını və olmayacağını bildirib.
AFN.az xəbər verir ki, o, bu fikirləri seçki qələbəsindən sonra səsləndirib.
Seçki qələbəsindən sonra San-Paulu şəhərindəki özəl otellərdən birində tərəfdarlarına müraciət edən Lula da Silva bu səlahiyyət müddətindən sonra yenidən namizəd olmayacağını bildirib.
Lula da Silva tərəfdarlarına təşəkkür edərək deyib ki, bütün bunlara görə onlara borcludur. O, Braziliyanın demokratiyasını xilas etdiyini, seçkidə dürüstlüyün, millətçiliyin və demokratiyanın qalib gəldiyini vurğulayıb. Siyasətçi Braziliyanın heç kimin arxa bağçası olmadığını və olmayacağını qeyd edib.
Siyasi karyerasındakı bu dönüş nöqtəsinə toxunan Lula da Silva böyük qürur hissi keçirdiyini bildirib. O, ölkədə universitet diplomu olmadan dörd dəfə demokratik yolla seçilən yeganə dövlət başçısı olduğunu deyib.
Lula da Silva təhsil sahəsində layihələri davam etdirəcəyini vurğulayaraq, ölkədə tam günlük təhsilin orta məktəb səviyyəsinədək genişləndiriləcəyini, orta məktəblərdə təhsil üçün yığım təşviqi proqramının ümumi əhatəyə alınacağını və universitetlərdə də belə bir proqramın həyata keçiriləcəyini bildirib.
O, Amerikanın süni intellektindən asılı olmaq istəmədiyini deyərək, ölkədə məlumat mərkəzləri qurmaq üçün bərpaolunan enerji potensialından istifadə etməklə Braziliyaya məxsus süni intellekt hazırlamaq istədiyini qeyd edib.
İqlim dəyişikliyi ilə mübarizə və Amazon meşələrinin qorunması ilə bağlı məlumatları da bölüşən Lula da Silva bu ilin ölkədə meşələrin qırılmasının ardıcıl dörd il ərzində azaldılmasına nail olunan ilk il olacağını bildirib.
Lula da Silva rəqəmsal platformalarda törədilən cinayətlər və texnologiya nəhənglərinin seçkilərə müdaxiləsi ilə bağlı xəbərdarlıq edib. O, rəqəmsal dünyada törədilən cinayətlərin real həyatda baş verən cinayətlərlə eyni şəkildə qiymətləndirilməli olduğunun hələ də dərk edilməməsini qəbuledilməz adlandırıb.
Siyasətçi ölkəyə vergi ödəmədən milyonlarla dollar qazanan və ölkədəki səslərə, eləcə də seçki nəticələrinə təsir göstərməyə çalışan nəhəng şirkətlərin fəaliyyətinə icazə verə bilməyəcəklərini vurğulayıb.
Lula da Silva çətinliklərə baxmayaraq səsverməyə gedən yaşlı seçicilərə də təşəkkür edib. O, səs vermək üçün nəvələrinin qucağında daşınan, hərəkət edə bilməyən, xərçəng və ya digər xəstəliklərlə mübarizə aparan insanların görüntülərini izlədiyini bildirib.
Seçki məntəqələrinin 99,89 faizinin açıldığı vaxt açıqlanan məlumatlara görə, Lula da Silva etibarlı səslərin 51,79 faizini qazanaraq qələbə elan edib. Keçmiş prezident Jair Bolsonaronun oğlu Flavio Bolsonaro isə 48,21 faiz səs toplayıb.
Braziliyada prezident seçkilərinin ikinci turunda qeyri-rəsmi nəticələrə əsasən Lula da Silvaya məğlub olan sağçı Bolsonaro nəticələri tanımadığını və seçkinin ləğvi üçün məhkəməyə müraciət edəcəyini açıqlamışdı.
