Britaniya peykləri qorumaq üçün hərbi kosmik eskadra yaradır
Britaniya kosmosdakı maraqlarını və gündəlik həyatın bir çox sahəsində istifadə olunan peykləri düşmən müdaxilələrindən və hücumlardan qorumaq üçün yeni hərbi kosmik eskadra yaradacaq.
AFN.az xəbər verir ki, Britaniya Kral Hərbi Hava Qüvvələrinin yaydığı açıqlamaya görə, ölkənin kosmosdakı maraqlarının qorunması, peyklərə qarşı düşmən müdaxilələrinin qarşısının alınması və rəqiblərin kosmik fəaliyyətlərinin dəf edilməsi məqsədilə yeni eskadra yaradılacaq.
3 saylı Kosmik Təsirlər Eskadrası adlandırılan yeni struktur silahlı qüvvələrin bütün pillələrindən olan komponentləri birləşdirəcək və orbitdəki peyklərin qorunmasına cavabdeh olacaq.
Kosmosdakı düşmən fəaliyyətlərini müşahidə və xəbərdarlıq edən 1 saylı Kosmik Əməliyyatlar Eskadrası ilə 2 saylı Kosmik Xəbərdarlıq Eskadrasının daxil olduğu strukturun bir hissəsi olacaq yeni eskadra bu cür fəaliyyətlərə qarşı birbaşa müdaxilə edəcək.
Hücum və müdafiə missiyalarını yerinə yetirəcək eskadra elektron müharibə vasitələri və peykləri hədəfə alan silahlara qarşı avadanlıqlarla təchiz ediləcək.
Britaniyanın müdafiə naziri Ues Stritinq yeni yaradılacaq eskadra ilə bağlı Britaniya Kosmik Qüvvələri Konfransında açıqlamalar verib.
Londonda keçirilən konfransda çıxış edən Stritinq eskadraya Star Trek filmindən ilhamlanaraq Ulduz Eskadrası adının verilməsi təklifinin Baş Qərargah rəisi tərəfindən rədd edildiyini bildirib.
Stritinq eskadranın düşmən fəaliyyətlərinin qarşısını almaq və onların təsirini azaltmaq vəzifəsini yerinə yetirəcəyini qeyd edib. O bildirib ki, yeni eskadra silahlı qüvvələrə ölkə üçün həyati əhəmiyyət daşıyan peykləri qorumağa, peykləri təhdid edən tərəfləri çəkindirməyə və rəqabətin getdikcə artdığı kosmik sahədə təhlükəsiz fəaliyyət göstərməyə imkan verəcək.
