Tramp israilliləri seçkilərdə Netanyahuya səs verməyə çağırdı
ABŞ Prezidenti Donald Tramp İsraildə oktyabrın 27-də keçirilməsi planlaşdırılan seçkilərdə Baş nazir Binyamin Netanyahuya dəstək çağırışını təkrarlayıb.
AFN.az xəbər verir ki, Tramp sosial media hesabında paylaşdığı mesajda israillilərə müraciət edərək baş nazir postu üçün Bibi ləqəbi ilə tanınan Netanyahuya səs verməyə çağırıb.
Tramp daha əvvəl görməyənlər üçün Netanyahuya dəstək mesajını yenidən paylaşdığını vurğulayıb. O bildirib ki, düşmənlər də daxil olmaqla hər kəsin bildiyi kimi, Netanyahu ilə qələbə qazanmaq baxımından əla münasibətləri olub. Tramp tarixdəki ən uğurlu hərbi əməliyyatlardan biri adlandırdığı Venesuelaya hücumu həyata keçirdiyini, lakin bundan əvvəl dünyanın terrorizmi ən çox dəstəkləyən dövlətinin nüvə silahına sahib olmasının qarşısını alan Gecəyarısı Çəkici əməliyyatının (Operation Midnight Hammer) keçirildiyini qeyd edib. Onun sözlərinə görə, bundan sonra Epik Qəzəb əməliyyatı (Operation Epic Fury) həyata keçirilib.
Bu əməliyyatlar nəticəsində İranın donanmasının və hava qüvvələrinin məhv edildiyini iddia edən Tramp ölkənin həm ordusunun, həm də iqtisadiyyatının dağıdılmış vəziyyətdə olduğunu, buna İranın inflyasiya səviyyəsinin 301 faiz təşkil etməsinin də daxil olduğunu bildirib. İran ətrafında tətbiq edilən dəniz blokadasının uğurlu olduğunu və hücumlar zamanı Tehran rejiminin rəhbərliyinin iki yüksək səviyyəli təbəqəsinin öldürüldüyünü xatırladan Tramp İsrail xalqına seçki günü Netanyahunun qeyri-adi döyüşçü baş nazir olduğunu unutmamağı tövsiyə edib.
Ad çəkmədən İranı tənqid edən Tramp bəzi çox pis insanların illərdir ABŞ-ni böyük şeytan, İsraili isə kiçik şeytan adlandırdıqlarını xatırladıb. O, dünyanın müxtəlif yerlərində səslənən Amerikaya ölüm və İsrailə ölüm şüarlarının artıq səsləndirilə bilməyəcəyini deyərək israilliləri baş nazir postu üçün Binyamin Netanyahuya səs verməyə və başladıqları işi başa çatdırmağa çağırıb.
Tramp oktyabrın 18-də sosial media hesabında yayımladığı mesajda da İsrail xalqına müraciət edərək oktyabrın 27-də keçiriləcək seçkilərdə Baş nazir Binyamin Netanyahuya dəstək verdiyini açıqlamışdı. O, Netanyahu haqqında İranın 51 ildir səsləndirdiyi İsrailə ölüm, Amerikaya ölüm, kiçik və böyük şeytanı məhv edəcəyik şüarlarına qarşı mübarizədə böyük döyüşçü, sülh üçün isə daha böyük tərəfdaş olduğunu bildirmişdi.
İranın bu təhdidləri həyata keçirməsinin yalnız zaman məsələsi olduğunu iddia edən Tramp ölkənin həm hərbi, həm də maliyyə baxımından sistemli şəkildə məhv edildiyini və davranışını tezliklə dəyişməyəcəyi təqdirdə onun işini bitirəcəklərini demişdi.
Tramp Netanyahunun yenidən seçilməyəcəyi təqdirdə ABŞ-nin İrana qarşı təkbaşına mübarizə aparmalı olacağını bildirərək bunu etməyə o qədər də həvəsli olmadığını açıqlamışdı. O, paylaşdığı mesajın İsraildəki seçki mübarizəsində Netanyahuya verdiyi dəstəyi ifadə etdiyini vurğulayaraq Netanyahunun israilliləri heç vaxt yarı yolda qoymayacağını bildirmişdi.
