Azərbaycan Kubokunun qalibi: "Neftçi" - "Turan Tovuz" matçı gərgin keçəcək
"Neftçi" - "Turan Tovuz" qarşılaşması maraqlı və gərgin olacaq. İlk görüşdə də bunun şahidi olduq".
Bunu "Report"a açıqlamasında "Qəbələ" və "Şamaxı"nın sabiq baş məşqçisi Sənan Qurbanov Azərbaycan Kubokunun yarımfinal mərhələsinin cavab oyunu ilə bağlı danışarkən deyib.
43 yaşlı mütəxəssis evdəki ilk matçda Tovuz təmsilçisinin yaxşı oyunla yadda qaldığını xatırladıb: "Son açıqlamalarda görsənir ki, "Neftçi" kuboku qazanmağı və mövsümü titulla başa vurmağı qarşısına məqsəd qoyub. Amma səfərdə çox çətinlik çəkdiklərini gördük. Düşünürəm ki, bu, hər iki tərəf üçün vacib görüşdür. "Ağ-qaralar" daha çox hücumda oynamağa çalışacaq. Çünki matça 0:1 hesabı ilə geridə başlayacaq. Qarşılaşma əlavə vaxta da gedə bilər. Kubokda hər nəticə gözlənilir. İlk dəqiqələrdən gərginlik hiss ediləcək. Burada futbolçuların psixoloji durumu da önə çıxacaq. Əlavə vaxt olsa, mövsümün sonunu nəzərə alaraq fiziki durumlar ön plana çıxacaq. Hansı kollektiv dözümlü olsa, finala vəsiqəni təmin edəcək. Futbolçular bunun üçün sonadək mübarizə aparmalıdırlar".
Qurbanov "Sizcə, Azərbaycan Kuboku "Neftçi"nin baş məşqçisi Laurentsiu Regekampf üçün son şansdırmı?" sualına qısa cavab verib: "Mən bu sualı cavablandırmaqda bir az çətinlik çəkirəm. Mətbuatda oxuyuram ki, onun qarşısına mövsümü titulla başa vurmaq tapşırığı qoyulub. . Yəqin ki, komanda mövsümü necə başa vuracaqsa, rəhbərlik qiymətləndirəcək və yekun qərar verəcək".
2018/2019 mövsümündə "Qəbələ" ilə titulu qazanan mütəxəssis sabiq komandasının oyunu haqqında da fikirlərini bölüşüb: "Qəbələdə də bol qollu qarşılaşma izləmişdik. "Səbail" iki top vursa da, meydan sahibləri geridönüş edə bildi. Kubok matçlarında proqnoz vermək çətindir. Komandalar finala vəsiqəni təmin etmək üçün bu oyunlara böyük motivasiya ilə çıxacaqlar. "Səbail" də geridönüş edə bilər. Amma nəzərə almalıyıq ki, "Qəbələ" son vaxtlar yaxşı formadadır. Bir sözlə, gərgin oyunlara şahidlik edəcəyik".
Qeyd edək ki, "Neftçi" - "Turan Tovuz" matçı aprelin 26-da, "Səbail" - "Qəbələ" görüşü isə bir gün sonra keçiriləcək. İlk qarşılaşmalarda Tovuz və Qəbələ təmsilçiləri müvafiq olaraq 1:0 və 3:2 hesablı qələbə qazanıblar.
