Türkiyənin F-35 layihəsinə qayıtması üçün bir sıra ciddi problemlər var
Türkiyənin beşinci nəsil F-35 təyyarələrinin istehsalı proqramına qayıtması üçün Türkiyədə Rusiyanın S-400 hava hücumundan müdafiə sistemlərinin olması ilə yanaşı, bir sıra maneələr də var.
Bu barədə “Yeni Şafak” qəzeti mənbələrə istinadən məlumat yayıb.
Ankara ilə Vaşinqton arasında bir sıra məsələlərdə fikir ayrılığı var - Şərqi Aralıq dənizindəki vəziyyət, Amerikanın Yunanıstana silah məsələlərində yardımı, Yaxın Şərqdəki vəziyyət, ABŞ-ın İsrailə dəstəyi, eləcə də kürd təşkilatlarının fəaliyyəti.
Bununla bağlı “Hürriyet” qəzeti qeyd edib ki, indiki mərhələdə Türkiyənin F-35-ə qayıtmaq üçün S-400 məsələsində geri çəkilməsi real görünmür. Üstəlik ABŞ Dövlət Departamentinin daha əvvəl Afinaya 8,6 milyard dollara Amerika F-35 qırıcıları və müvafiq avadanlıqların mümkün satışına icazə verməsi Ankara üçün problemə çevrilib.
Yunanıstan bu təyyarələri alarsa, onun donanması Türkiyədən bir texnoloji nəsil üstün olacaq. Eyni zamanda Yunanıstan F-16-larının 4+ nəslinin modernləşdirilməsi 2022-ci ildən bəri davam edir, amma Türkiyədə müvafiq proqram hələ başlamayıb.
