Blinken Ankara hava limanında işıqlar söndürülərək qarşılanıb
ABŞ dövlət katibi Antoni Blinken Türkiyənin xarici işlər naziri Hakan Fidanla görüşmək üçün Ankaraya gəlib.
Bu barədə “Axşam” qəzeti məlumat yayıb.
Siyasətçi ölkəyə gecə gəlib. Onu ABŞ-ın Ankaradakı səfiri Cefri Fleyk, Xarici İşlər Nazirliyinin ikitərəfli siyasi əlaqələr üzrə baş direktoru Yaprak Balkan, Ankara valisinin müavini Namiq Kamal Nazlı və bir sıra digər rəsmi şəxslər qarşılayıblar. Yüksək rütbəli türk məmuru siyasətçiyə yaxınlaşmayıb.
Bundan əlavə, hava limanında VIP zaldan kənarda işıqlandırma da söndürülüb. Nəşr bu qəbulu “şapalaqla müqayisə olunan etiraz” adlandırıb və bunun Türkiyədə ilk dəfə baş verdiyini bildirib.
Məlumdur ki, rəsmi görüşdə Qəzza zolağında hərbi vəziyyət, həmçinin regional məsələlər və ikitərəfli münasibətlər müzakirə olunacaq.
