Türkiyədə “Hakimlər işi” üzrə iki hakim üçün həbs tələbi
İstanbulda “Hakimlər işi” kimi tanınan araşdırma çərçivəsində keçirilən əməliyyat zamanı saxlanılan hakimlər Yasin Kol və Göktuğ Xəzər Erel həbs tələbi ilə növbətçi sülh cəza məhkəməsinə göndəriliblər.
AFN.az xəbər verir ki, İstanbul Respublika Baş Prokurorluğunun Qanunsuz Mərc və İdman Cinayətləri Bürosu tərəfindən bəzi şübhəlilər barəsində işgəncə, rəsmi sənəddə saxtakarlıq, etibardan sui-istifadə və şəxsi məlumatların qanunsuz yolla əldə edilməsi cinayətləri ilə bağlı “Hakimlər işi” araşdırması davam edir.
Araşdırma çərçivəsində saxlanılan Kol və Erelin polis idarəsindəki prosedurları başa çatıb.
Şübhəlilər tibbi müayinədən keçirildikdən sonra Çağlayandakı İstanbul Ədliyyə Sarayına gətirilib.
Prokurorluqda ifadələri alınan şübhəlilərdən Kol razılaşdırılmış oyunlar və təşviq mükafatı vermək cinayətinə, Erel isə rəsmi sənəddə saxtakarlıq cinayətinə görə həbs tələbi ilə növbətçi sülh cəza məhkəməsinə göndərilib.
İstanbul Təhlükəsizlik Müdirliyinin Maliyyə Cinayətləri ilə Mübarizə Şöbəsinin əməkdaşları tərəfindən İstanbul Respublika Baş Prokurorluğunun Qanunsuz Mərc və İdman Cinayətləri Bürosunun koordinasiyası ilə aparılan “Hakimlər işi” araşdırması çərçivəsində bəzi şübhəlilər barəsində işgəncə və rəsmi sənəddə saxtakarlıq cinayətləri ilə bağlı iddiaların olduğu müəyyən edilmişdi.
İş üzrə açıq mənbə araşdırmaları, Maliyyə Cinayətləri Araşdırma Şurasının (MASAK) və HTS məlumatlarının təhlili, şikayətçi və şahid ifadələri, eləcə də ekspertiza nəticələri əsasında Türkiyə Futbol Federasiyasının (TFF) Mərkəzi Hakimlər Komitəsinin (MHK) sədri Fərhad Gündoğdu ilə MHK-nın bəzi üzvləri, hakimlər və müşahidəçilərin cinayətlə əlaqəli ola biləcəyi qiymətləndirilmişdi.
Bununla əlaqədar İstanbul, Ankara, Elazığ və Manisada müəyyən edilən ünvanlara keçirilən əməliyyat zamanı MHK sədri Gündoğdu, Türkiyə Fəal Futbol Hakimləri və Müşahidəçiləri Dərnəyinin (TFFHGD) İstanbul şöbəsinin sədri Fərdi Karadoruk, keçmiş MHK sədr müavini Ahmet Şahin, keçmiş MHK üzvü Yunus Yıldırım, MHK Təhsil və 4-cü Region üzrə məsul şəxs Səbahəddin Şahin, TFFHGD İstanbul şöbəsinin Təşkilatlanma üzrə məsul şəxsi Alican Sağlar və TFFHGD İstanbul İl Hakimlər Komitəsinin sədri Əmrə Kosif saxlanılmışdı.
Araşdırma çərçivəsində Super Liqa hakimi Yasin Kol ilə Super Liqa köməkçi hakimi Göktuğ Xəzər Erelin də İstanbul Təhlükəsizlik Müdirliyinin Maliyyə Cinayətləri ilə Mübarizə Şöbəsinin əməkdaşları tərəfindən saxlanıldığı bildirilmişdi.
Hakimlik Gündoğdu, Kosif, Karadoruk, Yıldırım və Sağların həbsinə qərar vermişdi.
Şübhəlilər Səbahəddin Şahin və Əhməd Şahin barəsində isə xaricə çıxış qadağası və imza şəklində məhkəmə nəzarəti tədbirləri tətbiq edilmişdi.
Araşdırma çərçivəsində Super Liqa hakimi Yasin Kol ilə Super Liqa köməkçi hakimi Göktuğ Xəzər Erel də İstanbul Təhlükəsizlik Müdirliyinin Maliyyə Cinayətləri ilə Mübarizə Şöbəsinin əməkdaşları tərəfindən saxlanılaraq prosedurlar tamamlandıqdan sonra ədliyyə orqanlarına göndərilmişdi.
