Braziliya prezidenti: Maduro bizim deyil, Venesuelanın problemidir
Braziliya prezidenti Luiz İnasio Lula da Silva Venesuela prezidenti Nikolas Maduro ilə bağlı açıqlama verərək, “Maduro bizim problemimiz deyil, Venesuelanın problemidir” deyib.
AFN.az-ın xarici mətbuata istinadən verdiyi xəbərə görə, Lula da Silva ölkəsindəki bir televiziya kanalına verdiyi açıqlamada son vaxtlar diplomatik gərginlik yaşadıqları qonşu Venesuela lideri Maduro ilə maraqlanmadıqlarını vurğulayıb.
Braziliya prezidenti Lula da Silva "Digər ölkələr və liderlərlə gərginlik yaşadığımız zaman münasibətlərimizdə çox diqqətli olmalıyıq. Düşünürəm ki, Maduro bizim deyil, Venesuelanın problemidir. Narahat olmağa davam edə bilmərəm. Mənim missiyam Braziliyanın düzgün istiqamətdə hərəkət etməsini təmin etməkdir" deyib.
Venesuela xalqının rifahını arzuladıqlarını bildirən Lula da Silva heç bir ölkə ilə problemli siyasət yürütmək istəmədiklərini də əlavə edib.
Qeyd edək ki, iyulun 28-də Venesuelada keçirilən prezident seçkilərində Maduro qalib gəldikdən sonra Braziliya nəticələrə şübhə ilə yanaşaraq seçki protokollarının açıqlanmasını tələb edib ki, bu da iki qonşu ölkə arasında diplomatik gərginliyə səbəb olub.
