HƏMAS fevralın 22-də 6 israilli məhbusu azad etməyə razılaşıb
HƏMAS fevralın 22-də baş tutacaq mübadilə çərçivəsində üç deyil, altı israilli əsiri azad etməyə razılaşdığını açıqlayıb.
HƏMAS Siyasi Bürosunun üzvü Xəlil əl-Hayye İsraillə əldə olunan atəşkəs razılaşması çərçivəsində məhbus mübadiləsi gündəmi ilə bağlı açıqlama verib.
Hayye bildirib ki, Həmas 4 israilli əsirin cəsədini fevralın 20-də Qırmızı Xaça təhvil verəcək.
Bundan əlavə, Hayye fevralın 22-də əvvəlcədən planlaşdırıldığı kimi 3 deyil, 6 israilli əsiri azad ediləcəyini bildirib.
HƏMAS-ın atəşkəsin ikinci mərhələsini həyata keçirməyə hazır olduğunu bildirən Hayye, Təl-Əviv rəhbərliyinin atəşkəsin ikinci mərhələsi üçün danışıqlara başlamaqdan çəkindiyini qeyd edib.
Yerli media İsrail hökumətinin konteyner evlərin və tikinti texnikasının Qəzzaya daxil olmasına icazə vermək üçün fevralın 22-də üç israilli məhbus əvəzinə altı israilli məhbusun azad edilməsini tələb etdiyini bildirib.
İsrailin HƏMAS-ın bu addımından sonra qərarını dəyişib-dəyişdirməyəcəyi hələlik məlum deyil.
Fevralın 22-də HƏMAS-ın sağ qalan altı israilli əsiri azad etməsi ilə atəşkəs razılaşmasının birinci mərhələsində məhbus mübadiləsi əməliyyatları başa çatacaq.
