ABŞ Venesuelalı miqrantları Quantanamodan Hondurasa təxliyə edir
ABŞ hakimiyyəti Kubadakı Quantanamo bazasında saxlanılan miqrantların demək olar ki, hamısını Hondurasa köçürüb.
AFN.az xəbər verir ki, bu barədə mənbələrə istinadən "NBC News" məlumat yayıb.
Cümə axşamı səhər saatlarına olan məlumata görə, Quantanamoda hamısı Venesueladan olan 178 immiqrant olub. ABŞ Daxili Təhlükəsizlik Departamentinin (DHS) yüksək vəzifəli rəsmisi telekanala bildirib ki, onlardan 177-si elə həmin gün deportasiya edilib. Rəsmi bildirib ki, onlardan daha biri ABŞ-da həbsxanaya göndərilib.
Honduras Xarici İşlər Nazirliyi, ölkənin ABŞ-dan olan 174 venesuelalı mühacirlə reys qəbul etdiyini və onların dərhal Venesuelaya aparılmasına qərar verildiyini qeyd edib. Telekanalın mənbəsi ABŞ və Honduras tərəfindən verilən rəqəmlər arasındakı fərqi “sadəcə səhv” adlandırıb.
O, həmçinin bildirib ki, ABŞ hakimiyyəti Quantanamoya daha çox immiqrant göndərməyi və onları başqa ölkələrə göndərməzdən əvvəl bazaya “tranzit məntəqəsi” kimi baxmağı planlaşdırır. Eyni zamanda, daha iki mənbə telekanala bildirib ki, Daxili Təhlükəsizlik Nazirliyi Pentaqona miqrantların müvəqqəti saxlanması üçün alternativ yerlər tapmağı xahiş edir.
