Ukraynanın resurs sazişi layihəsini rədd etməsi ABŞ-ı yenidən qəzəbləndirə bilər - KİV
Kiyevin Vaşinqtonla Ukrayna faydalı qazıntılarının hasilatı ilə bağlı yeni saziş layihəsini imzalamaqdan mümkün imtinası ABŞ-da növbəti narazılıq dalğasına səbəb ola bilər.
AFN.az xəbər verir ki, bu analitik qiymətləndirmə “The Wall Street Journal”da dərc olunan məqalədə yer alıb.
Bildirilir ki, saziş bağlanarsa, Kiyev onun tam yerinə yetirilməyəcəyinə ümid etməli olacaq, çünki sənəd ABŞ-a Ukraynanın mineral ehtiyatları üzərində demək olar ki, tam nəzarəti verir.
Yeni saziş layihəsi Kiyevi 120 milyard dollardan çox məbləğdə yardım üçün kompensasiya ödəməyi öhdəsinə qoyur. ABŞ xüsusi fond vasitəsilə Ukraynanın neft və qaz ehtiyatlarının yarısına, bütün metallarına və dəmir yolları, limanlar, boru kəmərləri və zavodlar da daxil olmaqla infrastrukturunun böyük hissəsinə nəzarəti ələ keçirəcək. Kiyev 4% əlavə ödənişlə ən azı 100 milyard dollar ödəyənə qədər ABŞ bütün gəlir ayırmalarını alacaq. Yalnız bundan sonra Ukrayna gəlirdən ayırmaların 50%-ni almağa başlayacaq.
Nəşrin analitiklərinin fikrincə, bu şərtlər əvvəlkilərdən daha sərtdir. Əvvəlki variant Vladimir Zelenski ilə ABŞ rəhbərliyi arasında Ağ Evdə keçirilən görüşdə yaşanan qalmaqal səbəbindən uğursuzluğa düçar olub və bu, ABŞ və Ukrayna arasında münasibətlərin ciddi şəkildə pisləşməsinə səbəb olub.
Zelenski ABŞ-ın yeni saziş layihəsi təqdim etdiyini təsdiqləyib.
