KİV: Avropa İttifaqı Kiyevə 20 milyard avroluq hərbi yardım planı üzərində işləyir
Avropa İttifaqı növbəti dörd il ərzində Kiyev hakimiyyətinə 20 milyard avrodan çox hərbi dəstək verməyi özündə ehtiva edən sənəd hazırlayıb.
Bu barədə “The Wall Street Journal” əlində olan sənəd layihəsinə istinadən xəbər verib.
“Ukraynanın xarici dəstəkdən asılılığını nəzərə alsaq, Aİ ölkələri və tərəfdaşlarının qarşıdakı dövrdə edəcəyi seçim Ukraynaya ya həlledici irəliləyiş əldə etməyə imkan verəcək, ya da onun müqavimət göstərmək qabiliyyətini ciddi şəkildə sarsıdacaq”, – deyə nəşr sənəddən bir hissəyə istinad edir.
Yeni təklif 2022-ci ildə yaradılan Avropa Sülh Fondundan 6,5 milyard avro istifadə edəcək bir fondun yaradılmasını, əlavə olaraq 2024-cü ildən 2027-ci ilə qədər ona 5 milyard avronun kreditləşdirilməsini nəzərdə tutur. Burada Kiyev hakimiyyətinə hərbi yardımın göstərilməsi, o cümlədən döyüş sursatlarının, pilotsuz təyyarələrin və hava hücumundan müdafiə vasitələrinin alınması xərcləri nəzərdə tutulur. Fondun qalan hissəsi Ukrayna qoşunlarının döyüş hazırlığı proqramlarının xərclərini ödəyəcək. Təşəbbüs bu il Aİ ölkələri üçün 7,5 milyard avroya qədər kompensasiya nəzərdə tutur.
Nəşr bildirir ki, Ukraynaya yeni yardım planının müzakirəsi yaxın günlərdə başlayacaq və çox güman ki, fevralın 1-də Aİ sammitində müzakirə mövzularından birinə çevriləcək. Bununla belə, nəşr qeyd edir ki, yeni planla bağlı qərar qəbul etmək bir neçə həftə çəkəcək. Qəzet qeyd edir ki, planın həyata keçirilməsinə əsas maneə onun bütün Aİ ölkələri tərəfindən yekdilliklə təsdiqlənməsi zərurəti olacaq.
