Meksikada seldə həlak olanların sayı 72-yə yüksəldi
Meksikada güclü yağışların səbəb olduğu sel fəlakətində həyatını itirənlərin sayı 72-yə, itkin düşənlərin sayı isə 48-ə çatıb.
Meksika mətbuatının məlumatına görə, ötən həftədən etibarən Priscilla və Raymond tropik fırtınalarının gətirdiyi güclü yağışlar nəticəsində insan tələfatı artıb.
Fəlakət nəticəsində indiyədək 5 ştatda 72 nəfər həyatını itirib, 48 nəfər isə itkin düşüb.
Güclü yağışlardan ən çox zərər çəkən Veracruz, Puebla və Hidalgo ştatlarına 21 helikopter göndərilib və yeni xilasedici qüvvələr cəlb edilib.
Rəsmilər axtarış-xilasetmə işlərinin fasiləsiz davam etdiyini bildiriblər.
Digər tərəfdən, Meksika Federal Elektrik Komissiyasının (CFE) yaydığı açıqlamada seldən zərər çəkən 5 ştatda aparılan işlər nəticəsində enerji ötürmə xətlərinin 95,4 faizinin bərpa olunduğu, yaxın zamanda bu göstəricinin 100 faizə çatmasının gözlənildiyi qeyd olunub.
