Tramp süni intellekt təşəbbüsünə dair fərmanı imzaladı
ABŞ Prezidenti Donald Tramp süni intellektdən istifadə etməklə innovasiyanı təşviq etmək məqsədilə “Genesis Mission” adlı federal təşəbbüsü başladan fərmanı imzalayıb.
Ağ Evin sözügedən prezident fərmanı ilə bağlı açıqlamasında bildirilib ki, "Genesis Mission" ABŞ Enerji Nazirliyinə milli laboratoriyaların imkanlarından istifadə edərək ölkənin ən parlaq beyinlərini, ən güclü kompüterlərini və geniş elmi məlumat resurslarını ortaq bir tədqiqat ekosistemində bir araya gətirmə vəzifəsi verir.
Açıqlamada fərmanda Enerji Nazirliyinə qapalı dövrəli bir süni intellekt sınaq platforması yaratmaq tapşırığının verildiyi qeyd edilib və "Genesis Mission"ın dəstəklənməsi üçün akademiya və özəl sektorla əməkdaşlıq ediləcəyi vurğulanıb.
Həmçinin açıqlamada təşəbbüsün əsas prioritet sahələri arasında biotexnologiya, kritik materiallar, nüvə parçalanması və birləşmə enerjisi, kosmos tədqiqatları, kvant informasiya elmi, eləcə də yarımkeçiricilər və mikroelektronika kimi mövzuların yer aldığı bildirilib.
Tramp administrasiyasının "Genesis Mission" ilə qarşıdakı 10 ildə federal tədqiqat və inkişaf fəaliyyətlərinin səmərəliliyini və təsirini artırmağı hədəflədiyi qeyd olunub, süni intellektin elmi bir vasitə kimi istifadəsinin tədqiqat proseslərində inqilab yaradacağı vurğulanıb.
Açıqlamada "Genesis Mission"ın ABŞ-ın süni intellekt yarışında irəli çıxması və bu mövqeyini qoruması üçün bir platforma formalaşdıracağı bildirilib.
Bundan başqa, Trampın insanlığın rifahı, iqtisadi rəqabət qabiliyyəti və milli təhlükəsizlik baxımından ABŞ-ın süni intellekt sahəsində qlobal hakimiyyətinə üstünlük verməyə davam etdiyi vurğulanıb və bu çərçivədə yanvar ayından bəri görülən işlərdən də bəhs edilib.
