Rusiyanın neft və təbii qaz gəlirləri azalıb
Rusiya Maliyyə Nazirliyi yanvar ayında neft və təbii qaz gəlirlərinin ötən ilin eyni ayı ilə müqayisədə 50,1% azalaraq 393 milyard rubla, təxminən 5 milyard dollara düşdüyünü açıqlayıb.
Nazirlikdən verilən məlumatda bildirilir ki, neft qiymətlərinin aşağı düşməsi və rublun xarici valyutalar qarşısında dəyər qazanması səbəbindən ölkənin enerji ixracatı gəlirləri azalıb. Neft və təbii qaz sektorunda planlaşdırılandan daha çox gəlir itkisinin yaşandığı qeyd olunan açıqlamada yanvar ayı gəlirlərinin ötən ilin müvafiq dövrü ilə müqayisədə 50,1% azalaraq 393 milyard rubla gerilədiyi diqqətə çatdırılıb.
Qərb ölkələri Rusiyanın neft və təbii qaz sektoruna qarşı genişmiqyaslı sanksiyalar tətbiq edərkən, Rusiya da enerji ixracı üçün başda Asiya olmaqla, müxtəlif bölgələrdəki alternativ bazarlarda payını artırmağa çalışır.
"Böyük Yeddilik" (G7) və Avropa İttifaqı (Aİ) ölkələrinin Rusiyadan dəniz yolu ilə daşınan neftin idxalına qoyduğu qadağa və bir barel üçün 60 dollarlıq tavan qiymət tətbiqi 5 dekabr 2022-ci il tarixində qüvvəyə minmişdi.
Bu çərçivədə Rusiya nefti üçüncü ölkələrə müəyyən edilmiş qiymətdən daha baha satılacağı təqdirdə, G7 və Aİ ölkələrindəki şirkətlər həmin neftin daşınması, sığortalanması və vasitəçilik kimi müxtəlif xidmətləri göstərə bilmirlər. Bu xidmətlərin təmin edilməsi üçün Rusiya nefti mütləq tavan qiymətdən aşağı qiymətə satılmalıdır. Sözügedən tavan qiymət həddi 2025-ci ilin iyul ayında 47,6 dollara endirilmişdi.
