Yaxın Şərq neftinin qiyməti 153 dolları ötərək rekord vurdu
ABŞ və İsrailin İrana qarşı hücumları, habelə Hörmüz boğazındakı blokada enerji bazarlarında bənzəri görülməmiş bir böhrana yol açıb.
AFN.az xəbər verir ki, tədarükün kəsilməsi səbəbindən Yaxın Şərq neft göstəriciləri bütün zamanların ən yüksək səviyyəsinə qalxaraq dünyanın ən bahalı neftinə çevrilib.
"S&P Global Platts"ın məlumatına görə, "Dubay" markalı xam neftin bir barreli 153,25 dollardan ticarət olunaraq "Brent" neftinin 2008-ci ildəki 147,50 dollarlıq tarixi rekordunu geridə qoyub. Oxşar şəkildə "Oman" xam neftinin qiyməti də 147,79 dollarla öz rekordunu təzələyib.
Müharibə səbəbindən Hörmüz boğazından keçidlərin dayanması neft daşınmasında böyük bir boşluq yaradıb və "Dubay" neftinin fevral ayında 90 sent olan svop mükafatı martda təxminən 56 dollara yüksələrək neftin dəyərinin üçdə birinə çatıb. Boğazdakı blokada nəticəsində Asiyaya edilən ixrac gündəlik 11,6 milyon barrelə düşüb ki, bu da fevraldakı 19 milyon barrelə nisbətən 32 faiz azalma deməkdir.
Artan xərclər və xammal qıtlığı səbəbindən bir çox Asiya neft emalı zavodu fəaliyyətini azaltmaq məcburiyyətində qalıb. Yaxın Şərqdən tədarük təmin edə bilməyən zavodların Amerika və Afrika qitəsinə yönəlməsi ilə bu bölgələrdəki neft qiymətləri də kəskin artıb. Belə ki, Braziliya xam neftinin barreli üçün əlavə ödəniş 12-15 dollar diapazonuna yüksələrək rekord vurub.
