ABŞ öz vətəndaşlarına Livanı tərk etməyi tövsiyə edib
ABŞ-nin Beyrutdakı səfirliyi Livandakı Amerika vətəndaşlarına təhlükəsizlik vəziyyətinin qəfil dəyişə biləcəyi ilə bağlı xəbərdarlıq edərək, hələlik kommersiya uçuşları mövcud ikən ölkəni tərk etməyi məsləhət görüb.
AFN.az xəbər verir ki, səfirlik tərəfindən yayılan rəsmi bəyanatda regiondakı vəziyyətin yaxından izlənildiyi və təhlükəsizlik mühitinin mürəkkəb olaraq qaldığı bildirilib. Diplomatik nümayəndəlik vətəndaşlarını mövcud uçuş imkanlarından yararlanaraq Livanı dərhal tərk etməyə çağırıb.
Açıqlamada həmçinin qeyd olunub ki, ölkədə qalan və ayrılmaq istəməyən şəxslər fövqəladə hallar üçün şəxsi planlarını hazırlamalı və son hadisələri diqqətlə izləməlidirlər. Səfirlik hadisələrin gedişatına uyğun olaraq xəbərdarlıqların yenilənə biləcəyini də vurğulayıb.
