ABŞ Hind okeanında üzən "USS George HW Bush" aviadaşıyıcısının fotosunu paylaşdı
ABŞ Mərkəzi Komandanlığı (CENTCOM) Hind okeanı sularında hərəkət edən "USS George HW Bush" aviadaşıyıcısının görüntüsünü paylaşaraq Hörmüz boğazı ətrafındakı Amerika varlığına diqqət çəkib.
AFN.az xəbər verir ki, CENTCOM "X" sosial media platformasındakı hesabından Hind okeanında üzən "USS George HW Bush" gəmisinin fotosunu yayımlayıb.
Paylaşımda "Nimitz" sinfinə aid olan "USS George HW Bush (CVN 77)" aviadaşıyıcısının 23 aprel tarixində ABŞ Mərkəzi Komandanlığının məsuliyyət zonasında, Hind okeanında hərəkətdə olduğu qeyd edilib.
CENTCOM daha əvvəlki paylaşımında İrana qarşı blokadanın başlanmasından bu yana ABŞ qüvvələri tərəfindən Hörmüz boğazına girişi əngəllənən gəmilərin sayının 33-ə çatdığını bəyan etmişdi.
Bu gün səhər saatlarında isə ABŞ Müdafiə Nazirliyinin (Pentaqon) "X" hesabından Hind okeanında bir neft tankerinə əl qoyulması ilə bağlı görüntülü paylaşım edilib.
Həmin paylaşımda ABŞ Hind-Sakit Okean Komandanlığının (INDOPACOM) məsuliyyət zonasında hərəkət edən, sanksiya tətbiq olunduğu və İrandan neft daşıdığı bildirilən bayraqsız "M/T Majestic X" adlı tankerə müdaxilə anı əks olunub.
Bu hadisələr ABŞ Prezidenti Donald Trampın Pakistanın da xahişi ilə İran sazişlə bağlı təklifini təqdim edənə qədər atəşkəsi uzatmaq qərarını elan etməsindən sonra bölgədə yaşanan qeyri-müəyyən gözlənti fonunda baş verib.
