Nəzarətdən çıxan süni intellekt ABŞ-ni qarışdırdı: Söndürmə düyməsinə basın
ABŞ konqresmenləri ictimaiyyətə təhdid törədə biləcək süni intellekt alətlərinin cəld şəkildə söndürülməsi üçün hökumətə səlahiyyət verilməsini istəyirlər.
AFN.az xəbər verir ki, Nümayəndələr Palatasının Demokrat üzvü Ted Lyo və Respublikaçı üzvü Nataniel Moran "Süni İntellekt Təcili Söndürmə Düyməsi Qanunu" (AI Kill Switch Act) başlıqlı qanun layihəsi təqdim ediblər.
Konqresmenlər bu addımı "OpenAI"ın hazırladığı süni intellekt modellərinin nəzarətdən çıxaraq kompyuter kodlaşdırma məlumatlarının saxlanıldığı böyük bir anbara sızdığını bəyan etməsindən sonra atıblar.
Lyo verdiyi açıqlamada süni intellekt sistemlərinin təcili söndürmə mexanizminə malik olmasının məcburi olduğunu bildirərək, "Federal hökumətin nəzarətdən çıxan süni intellekt modellərini dayandırmaq mövzusunda açıq səlahiyyətə və prosesə malik olması qaçılmazdır" deyib.
Moran isə "Süni intellekt inkişaf etməyə davam edəcək və etməlidir də. Lakin idarəetmə məsuliyyəti insanların yaratdıqları texnologiyanı nəzarətdə saxlamaq qabiliyyətini qorumasını təmin etməkdir" dəyərləndirməsini edib.
Təsisçilərindən Sem Altman idarəçiliyində olan "OpenAI" nümayəndələri mövzu ilə bağlı açıqlama verməyiblər.
Şirkət əvvəllər verdiyi bəyanatlarda süni intellekt texnologiyasının bütün bəşəriyyətə fayda verməsini dövlət siyasəti vasitəsilə də təminat altına almaq istədiyini bildirmişdi.
Sözügedən qanun layihəsi Daxili Təhlükəsizlik Nazirliyinə özəl şirkətlərə süni intellekt modellərini və ya alətlərini söndürmək əmri vermək səlahiyyətinin tanınmasını nəzərdə tutur.
Layihə həmçinin bu növ texnologiyaları hazırlayan şirkətlərin sistemləri ləngitmək, dondurmaq və ya tamamilə söndürmək istiqamətində texniki qabiliyyətə malik olmalarını şərt qoyur.
Çox sayda texnologiya şirkəti hazırladıqları süni intellekt modellərini və alətlərini ABŞ dövlət qurumlarına ilkin baxış kimi təqdim etməyə razılıq versə də, bu sistemlərin fəaliyyətinə müdaxilə etmək və ya tamamilə söndürmək məcburiyyəti yoxdur.
Qanun layihəsi eyni zamanda süni intellekt şirkətlərinin texniki axsamaları və ya uğursuzluqları hökumətə bildirməsini və hadisələrə müdaxilə üçün ləngitmədən tam söndürməyə qədər uzanan rəsmi çərçivənin yaradılmasını əhatə edir.
Lyo bəyanatında "OpenAI"ın ən böyük rəqiblərindən olan "Anthropic" şirkətinə və son dövrdə yaşanan problemlərə də toxunub.
Lyo "Anthropic"in "Mythos" və "Fable" modellərinin kiber quldurluq qabiliyyətləri səbəbindən Ticarət Nazirliyinin bu sistemlərin ictimaiyyətə açılmasını əngəlləmək üçün ixrac qanununa müraciət etdiyini xatırladıb.
"Anthropic" tərəfindən də məsələyə dair cavab verilməyib.
"Anthropic" həmtəsisçisi Cek Klark süni intellektin inkişafına nəzarət etməyə yönəlmiş daha çox dövlət siyasətinə ehtiyac olduğunu bildirib.
Klark "Ayağınızı qazdan çəkib tormoza basmaq seçiminə malik olmaq istəyərsiniz. Hazırda süni intellekt sektorunun qaz pedalı var, lakin tormoz pedalı yoxdur" ifadələrini işlədib.
Layihəni təqdim edən Lyo süni intellektin sadəcə suallara cavab verən texnologiya olmaqdan çıxıb maliyyə əməliyyatlarını həyata keçirən, nəqliyyat sistemlərini idarə edən və ya kiber müdafiə və hücum reallaşdıran fəal bir struktura çevrildiyini vurğulayıb.
Pentaqon ABŞ ordusunun "Google", "OpenAI", "Amazon", "Microsoft", "SpaceX", "Oracle", "Nvidia" və "Reflection" kimi şirkətlərlə bağlanan müqavilələr çərçivəsində prioritet süni intellekt yönümlü qüvvəyə çevrildiyini açıqlamışdı.
Lyo təkmilləşdirilmiş süni intellekt sistemlərinin nəzarətdən çıxa biləcəyini, təhlükəli davranışlar nümayiş etdirə biləcəyini və hətta insan müdaxiləsinə müqavimət göstərə biləcəyini qeyd edib.
Təqdim olunan layihənin hökumətin bu növ hallara cəld müdaxilə edə bilməsini təmin edəcəyini bildirib.
Qanun layihəsi "The AI Policy Network", "Americans for Responsible Innovation" və "ControlAI" kimi texnologiya və süni intellekt təhlükəsizliyi qrupları tərəfindən də dəstəklənib.
