1400 peykin izləri bir fotoda: Astrofotoqrafın işi müzakirə yaratdı
Yeni Zelandiyalı astrofotoqraf Brendan Larsen Taranaki dağı üzərində çəkdiyi və minlərlə peyk izinin göründüyü fotonun süni intellekt vasitəsilə yaradıldığı barədə iddialara cavab verib. Sosial şəbəkələrdə milyonlarla dəfə izlənilən görüntü izləyicilər arasında geniş müzakirələrə səbəb olub.
AFN.az xəbər verir ki, Larsen bu işi ərsəyə gətirmək üçün sentyabr ayında çəkiliş aparıb və iki saat ərzində səkkiz saniyəlik ekspozisiya ilə 578 fotoşəkil çəkib.
Fotoqraf daha sonra Adobe Photoshop proqramında təxminən 40 saatlıq redaktə işi aparıb. Hər bir kadrdakı peyk izləri ayrı-ayrılıqda birləşdirilərək səmadakı intensiv hərəkətlilik nümayiş etdirilib.
Hazırlanan yekun fotoda Taranaki dağı üzərində təxminən 1 400 peykə aid 14 min xəttin yaratdığı sıx şəbəkə görünür.
Oktyabr ayında sosial şəbəkələrdə paylaşılan görüntü qısa müddətdə milyonlarla baxış və qarşılıqlı əlaqə toplayıb. Süni intellektlə bağlı tənqidləri əvvəlcədən gözlədiyini bildirən Larsen çəkiliş prosesini qeydə aldığı videonu da ictimaiyyətlə bölüşüb.
İşə yazılan şərhlərin böyük hissəsində səmadakı peyk çirklənməsinin qorxuducu həddə çatdığı vurğulanıb.
Yer orbitində aktiv fəaliyyət göstərən təxminən 16 min peyklə yanaşı, çoxlu sayda kosmik tullantı da mövcuddur.
Ekspertlər artan kosmik hərəkətliliyin atmosferin quruluşuna və astronomik müşahidələrə mənfi təsir göstərə biləcəyi barədə xəbərdarlıq edirlər.
Larsen fotonun kosmik resurslardan məsuliyyətli istifadə ilə bağlı məlumatlılığı artıracağına ümid etdiyini bildirib.
