BDU-da Qarabağ Zəfərinin informasiya müstəvisində rolu tədqiq olunur
Bakı Dövlət Universitetinin (BDU) İnformasiya və sənəd menecmenti fakültəsində "Qarabağ Zəfəri informasiya müstəvisində" mövzusunda elmi seminar keçirilib.
Elmi seminarda BDU-nun Sənəd menecmenti kafedrasının magistrantı Mümtaz Xəlilzadə mövzu üzrə məruzə edib.
Məruzədə Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə tarixi Zəfərlə başa çatmış Vətən müharibəsindən, eləcə də Qarabağda aparılmış birgünlük antiterror əməliyyatları nəticəsində ölkəmizin suverenliyinin bərpasından sonra müharibə və postmüharibə dövründə baş verən proseslərin, dövlətimizin bu sahədəki ardıcıl siyasətinin informasiya müstəvisində təhlili aparılıb. Vətən müharibəsi günlərində və hazırkı dövrdə informasiya cəbhəsində ölkəmizin aparıcı rolundan bəhs olunub. Qeyd edilib ki, 44 günlük Vətən müharibəsi yalnız hərbi-strateji qələbə kontekstində deyil, Azərbaycanın informasiya müstəvisində apardığı mübarizənin tarixi nailiyyəti kimi mühüm əhəmiyyət kəsb edir.
Araşdırmada müasir münaqişələrdə informasiya amilinin artan əhəmiyyəti, hibrid müharibə strategiyaları, dezinformasiya və informasiya manipulyasiyalarının təsir mexanizmləri elmi-nəzəri aspektdən şərh edilib. Mümtaz Xəlilzadə çıxışında Ermənistanın müharibə dövründə həyata keçirdiyi dezinformasiya kampaniyalarına, xarici media və lobbi şəbəkələri vasitəsilə beynəlxalq ictimai rəyə təsir cəhdlərinə diqqət çəkib. Azərbaycanın çevik və faktlara əsaslanan informasiya siyasəti, dövlət qurumlarının operativ məlumatlandırma fəaliyyəti, yerli informasiya cəbhəsindəki rolu sayəsində düşmənin bütün cəhdlərinin iflasa uğradığını bildirib.
Məruzədə Prezident, Müzəffər Ali Baş Komandan İlham Əliyevin müharibə günlərində beynəlxalq media qurumlarına verdiyi müsahibələrin informasiya strategiyasındakı yeri xüsusi vurğulanıb. "Dəmir yumruq" ideologiyası ətrafında formalaşan Ali Baş Komandan–Ordu–Xalq birliyinin informasiya müstəvisindəki mənəvi-ideoloji əhəmiyyəti diqqətə çatdırılıb. Qeyd olunub ki, dövlət başçısının beynəlxalq auditoriya qarşısında Azərbaycanın mövqeyini əsaslandırması, tarixi və hüquqi faktları dünya ictimaiyyətinin diqqətinə çatdırması, qarşı tərəfin dezinformasiya cəhdlərinə tutarlı cavablar verməsi tarixi qələbəmizi şərtləndirən mühüm amil kimi müharibənin taleyində həlledici rol oynayıb.
BDU kollektivinin bu sahədəki fəaliyyətindən bəhs edən məruzəçi bildirib ki, Vətən müharibəsi günlərində Universitet adından bir sıra müraciət və bəyanatlar yayılıb, ölkəmizin informasiya cəbhəsindəki mübarizəsinə dəstək verilib: "Həmin tarixi günlərdə BDU rektorunun Universitetin əməkdaşlıq etdiyi xarici universitetlərin rektorlarına ünvanladığı məktub, Hüquq fakültəsinin "İnsan hüquqları və informasiya hüququ" üzrə UNESCO kafedrasının UNESCO və onun institutlarına müraciəti, Jurnalistika fakültəsinin professor-müəllim heyətinin beynəlxalq qurumlar və beynəlxalq jurnalist təşkilatlarına göndərdikləri bəyanat bu istiqamətdə mühüm əhəmiyyət kəsb edir".
Gənc tədqiqatçı Universitet tərəfindən bu istiqamətdə hazırlanmış nəşrləri də yüksək qiymətləndirib: "Azərbaycan Respublikasının Prezidenti İlham Əliyevin Vətən müharibəsi dövründə xarici kütləvi informasiya vasitələrinə müsahibələri", "Vətən müharibəsi dövründə Bakı Dövlət Universitetinin professor-müəllim heyəti və tələbələrinin ölkə mediasında çıxışları", "Bakı Dövlət Universiteti Vətən müharibəsi dövründə", "Vətən müharibəsi yerli və xarici mediada" kitabları həmin dövrün informasiya müstəvisindən təhlili baxımından mühüm mənbələr kimi hər zaman aktualdır".
Araşdırmada həmçinin sosial media platformalarının informasiya müharibəsində rolu, vətəndaş jurnalistikasının imkanları, hərbi müxbirlərin ekstremal şəraitdə fəaliyyəti və etibarlı informasiya mənbələrinin ictimai rəyin formalaşmasında əhəmiyyəti diqqətə çatdırılıb.
Elmi seminar müzakirələrlə davam edib.
