ABŞ-da aralıq seçkilərdə səsvermə başlayıb
ABŞ-da Konqresdəki güc balansını köklü şəkildə dəyişə biləcək 2026-cı il aralıq seçkilərində səsvermə başlayıb.
AFN.az xəbər verir ki, Prezident Donald Trampın səlahiyyət müddətinin tam ortasına təsadüf edən seçkilər həm Respublikaçılar Partiyası, həm də Ağ Evin gələcəyi baxımından tarixi sınaq hesab olunur. Həyat bahalılığı, artan inflyasiya və İranla davam edən müharibənin kölgəsində keçirilən səsvermənin nəticələri Konqresə nəzarəti və Trampın prezidentlik müddətinin qalan iki ilinin siyasi mənzərəsini müəyyən edəcək.
Seçicilərin seçimini müəyyənləşdirən ən mühüm məsələlərdən biri yaşayış xərclərinin artması olub. Tramp administrasiyasının sərt gömrük rüsumları və İranla hərbi toqquşmaların təsiri nəticəsində ərzaq və yanacaq qiymətlərinin yüksəlməsi seçicilərin narazılığına səbəb olur. Seçkilərdən əvvəl bir qallonu 3,75 dollar olan dizel yanacağının qiyməti sentyabr ayında 6,52 dollara çataraq tarixi rekord qırıb. İnflyasiya da Trampın vəzifəyə gəldiyi vaxtdakı 3 faiz səviyyəsindən 3,7 faizə yüksəlib.
İctimai rəy sorğularında dəstək səviyyəsi 38 faizə qədər geriləyən Tramp partiyadaşlarına dəstək qazandırmaq məqsədilə son həftələrdə intensiv mitinqlər keçirib. Lakin iqtisadi vəziyyətin pisləşməsi Respublikaçılar Partiyasının ənənəvi olaraq güclü olduğu Kanzas, Ayova və Texas kimi ştatlarda belə mübarizənin gərgin keçməsinə səbəb olub.
Respublikaçıların qələbəsinə əmin olduqları Kanzas ştatındakı Senat yarışına milyonlarla dollarlıq reklam büdcəsi ayırmasını şərh edən “Cook Political Report” siyasi təhlil qurumunun redaktoru Carrie Dann bildirib ki, qalib gəlməli olduqları bir ştata pul xərcləməyə başlayıblarsa, deməli, ciddi problemlə üzləşdiklərini bilirlər.
Tramp isə mitinqlərində seçicilərə birbaşa müraciət edərək bu seçkidə bülletendə öz adı varmış kimi səs vermələrini istəyib və tərəfdarlarını seçki məntəqələrinə getməyə çağırıb.
Rəy sorğuları mövcud iqtisadi narazılığın Demokratlara üstünlük qazandırdığını və Nümayəndələr Palatasında çoxluğun dəyişə biləcəyini göstərir. Lakin Demokrat Partiyasına seçici dəstəyinin 29 faiz səviyyəsində qalması narazı Respublikaçı seçicilərin mövqelərini dəyişib-dəyişməyəcəyi ilə bağlı suallar yaradır.
35 yerin yenilənəcəyi Senatda Demokratların nəzarəti ələ keçirməsi üçün xalis olaraq ən azı 4 mandat qazanması lazımdır. Seçkinin nəticəsinə təsir edə biləcək əsas ştatlar Miçiqan, Texas, Ohayo, Ayova, Men, Alyaska və Şimali Karolina hesab olunur.
Nümayəndələr Palatasının Demokratların nəzarətinə keçəcəyi təqdirdə Trampın qanunvericilik gündəminin qarşısının alınacağı və kabinet üzvlərinə qarşı impiçment araşdırmalarının başlanacağı gözlənilir.
