Hörmüz boğazının bağlanması Aİ-yə 127 milyard avroya başa gəlib
Avropa İttifaqı (Aİ) Komissiyasının sədri Ursula fon der Leyen Hörmüz boğazının bağlanmasından bəri idxal olunan fosil yanacaqların Avropaya 127 milyard avro əlavə xərc yaratdığını bildirib.
AFN.az xəbər verir ki, fon der Leyen Brüsseldə keçirilən WinWin Sammitində çıxışı zamanı Avropanın rəqabət qabiliyyəti, təmiz enerjiyə keçid və süni intellekt sahəsindəki prioritetlərini dəyərləndirib.
Bu il quraqlıq, meşə yanğınları və daşqınlarla iqlim dəyişikliyinin dağıdıcı təsirlərinin müşahidə olunduğunu xatırladan fon der Leyen təmiz enerjiyə keçidin əhəmiyyətinə diqqət çəkib.
İdxal olunan fosil yanacaqlardan asılılığın yaratdığı xərclərə diqqət çəkən fon der Leyen Hörmüz boğazının bağlanmasından bəri idxal olunan fosil yanacaqların Avropaya 127 milyard avro əlavə xərc yaratdığını deyib.
Neft və təbii qaz idxalının özü ilə şok və böhran riskini gətirdiyini vurğulayan fon der Leyen təmiz enerjiyə keçidin iqlimlə yanaşı, Avropanın rəqabət qabiliyyəti və müstəqilliyi baxımından da əhəmiyyət daşıdığını bildirib.
Fon der Leyen Avropanın 2050-ci ilədək iqlim baxımından neytral olan ilk qitə olmaq hədəfini qoruduğunu qeyd edərək, 2040-cı il üzrə iqlim hədəfi ilə bağlı əldə olunan razılaşmanın bu istiqamətdə mühüm addım olduğunu ifadə edib.
Avropanın 2040-cı ilədək emissiyalarını 90 faiz azaltmağı öhdəsinə götürdüyünü xatırladan fon der Leyen Aİ üzrə 2021-ci ildən bəri davamlı fəaliyyətlərə 1,2 trilyon avrodan çox investisiya yatırıldığını bildirib.
Bu investisiyaların uzunmüddətli proqnozlaşdırıla bilənlik tələb etdiyinə diqqət çəkən fon der Leyen hədəflərinə sadiq qalaraq təmiz sənaye sahələrini dəstəkləyəcəklərini deyib.
Qlobal təmiz texnologiyalar bazarının hər il təxminən 20 faiz böyüdüyünü bildirən fon der Leyen Avropanın bu texnologiyaların yalnız istifadə edildiyi deyil, həm də inkişaf etdirildiyi və istehsal olunduğu məkan olması lazım olduğunu vurğulayıb.
Fon der Leyen Aİ-nin Emissiyaların Ticarət Sistemi (ETS) 2005-ci ildə tətbiq olunandan bəri onun əhatə etdiyi sektorlarda emissiyaların təxminən 50 faiz azaldığını, iqtisadiyyatın isə 30 faiz böyüdüyünü bildirib.
Sistemin innovasiyalara və təmiz texnologiyalara yenidən investisiya yatırılması üçün 270 milyard avrodan çox gəlir təmin etdiyini qeyd edən fon der Leyen sənayenin transformasiyasını dəstəkləmək məqsədilə üzərində işlədikləri Sənayenin Karbonsuzlaşdırılması Bankı vasitəsilə 100 milyard avro həcmində vəsaiti səfərbər etməyi hədəflədiklərini bildirib.
