ABŞ-dəki seçkilərdə proqram xətası: ABŞ vətəndaşı olmayan yüzlərlə şəxs səs verib
ABŞ-nin Nyu-Cersi ştatında baş verən proqram xətası ABŞ vətəndaşı olmayan minlərlə şəxsin seçici siyahısına salınmasına və bunlardan təxminən 400-ünün səs verməsinə səbəb olub.
AFN.az xəbər verir ki, Nyu-Cersi qubernatoru Miki Şerrill tərəfindən verilən açıqlamaya görə, texniki nasazlıq 2023-cü ilin ortaları ilə 2024-cü ilin ortaları arasında ştatın Avtomobil Nəqliyyatı Komissiyası vasitəsilə sürücülük vəsiqəsi və ya şəxsiyyət vəsiqəsi üçün müraciət edən təxminən 6 min 600 nəfərə təsir edib.
Müraciət edənlər ekranda ABŞ vətəndaşı olmadıqlarını bəyan etmələrinə baxmayaraq, sistemdəki nasazlıq səbəbindən avtomatik olaraq seçici siyahılarına əlavə olunublar.
Ştat rəsmiləri səhvən qeydiyyata alınan şəxslərdən 400-dən azının səs verdiyini bildiriblər.
İstifadə olunan səslərin 2024-cü il seçkilərində Nyu-Cersidə verilən 4 milyondan çox səsin 0,01 faizindən azına bərabər olduğu və hər hansı bir seçkinin nəticəsinə təsir etmədiyi qeyd olunub.
Problemin bu yaxınlarda ortaya çıxdığını ifadə edən qubernator Şerrill genişmiqyaslı araşdırma tapşırığı verdiyini, qanunsuz qeydlərin silindiyini və aidiyyəti proqram təminatçısı şirkətin dəyişdiriləcəyini açıqlayıb.
Şerrill həmçinin vəziyyəti daha əvvəl müəyyən edib ictimaiyyətə açıqlamadığı əsası ilə əvvəlki ştat rəhbərliyini də tənqid edib.
Baş verənlər ölkədə seçki təhlükəsizliyi müzakirələrini yenidən alovlandırıb.
Ağ Ev bu hadisənin ABŞ Prezidenti Donald Trampın ştatların federal seçkilərdə vətəndaşlığın təsdiqlənməsini məcburi etməsini nəzərdə tutan "SAVE America" qanununun qəbul edilməsi zərurətini ortaya qoyduğunu müdafiə edib.
Demokratlar və səsvermə hüququ müdafiəçiləri isə hadisənin sadəcə inzibati xətadan ibarət olduğunu bildiriblər.
